நடிகர் அப்பாஸ் தமிழ் சினிமாவில் “காதல் தேசம்” திரைப்படத்தின் மூலம் தனது அறிமுகத்தை செய்துகொண்டார். வினீத், தபு உள்ளிட்ட நடிகர்களுடன் நடித்த இந்த திரைப்படம் காதல் மட்டுமல்ல, நட்பின் முக்கியத்துவத்தையும் பேசும் கதையாக அமைந்தது. இயக்குநர் கதிரின் இயக்கத்தில் வெளியான இப்படம் அப்பாஸுக்கு மிகப்பெரிய அறிமுகத்தை வழங்கியது.
அப்பாஸ் தொடர்ந்து ரஜினிகாந்த், கமல்ஹாசன், மம்முட்டி உள்ளிட்ட முன்னணி நடிகர்களுடன் நடித்தாலும், தனிப்பட்ட ஹீரோவாக மிகுந்த வெற்றி பெற முடியவில்லை. தமிழ், தெலுங்கு உள்ளிட்ட தென்னிந்திய மொழிகளில் 40க்கும் மேற்பட்ட படங்களில் நடித்தவர். ஆனால், ஒரு கட்டத்தில் அவருக்கு பட வாய்ப்புகள் குறைய தொடங்கியது, இதனால் அவர் குடும்பத்துடன் அமெரிக்காவில் செட்டிலாக முடிவெடுத்தார். சமீபத்தில் அவர் அளித்த பேட்டியில், தனது தொடக்க காலங்களில் பெட்ரோல் பங்க் மற்றும் ஹோட்டல் போன்ற இடங்களில் வேலை செய்ததாக வெளிப்படுத்தியிருந்தார். ஒரு பிரபல நடிகர் இவ்வாறு சாதாரண வேலை செய்தது அவரது ரசிகர்களை ஆச்சரியப்படுத்தியது.
இந்நிலையில், சினிமாவில் 10 ஆண்டுகளாக நடிக்காமல் இருந்த அப்பாஸ், தற்போது மீண்டும் திரையுலகிற்கு திரும்பியுள்ளார். பிரபல இயக்குநர்கள் புஷ்கர் – காயத்ரி தயாரிப்பில், இயக்குநர் சற்குணம் இயக்கத்தில் உருவாகும் ஒரு வெப் தொடரில் அவர் நடிக்கிறார். இந்த வெப் தொடர் “எக்ஸாம்” என்று பெயரிடப்பட்டுள்ளது. இதில், அப்பாஸுடன் துஷாரா விஜயன் மற்றும் அதிதி பாலன் ஆகியோரும் நடித்துள்ளனர். 10 வருடங்களுக்குப் பிறகு திரையுலகிற்கு திரும்பிய அவருக்கு புஷ்கர் – காயத்ரி தயாரிப்பு ஒரு நல்ல வாய்ப்பாக அமைந்துள்ளது. இந்த ரீ-என்ட்ரி மூலம் அப்பாஸ் மீண்டும் சிறப்பாக ஈர்க்க முடியும் என்று எதிர்பார்க்கலாம்.
