தமிழ் சினிமாவின் முன்னணி நடிகராக மட்டுமல்லாமல், ஒரு தீவிரமான கார்பந்தய வீரராகவும் திகழ்ந்து வருபவர் நடிகர் அஜித்குமார். இவர் ‘குட் பேட் அக்லி’ திரைப்படத்திற்குப் பிறகு தனது முழு கவனத்தையும் கார் ரேசிங்கில் செலுத்தி வருகிறார்.
கடந்த ஆண்டு முதல் கார்பந்தய உலகில் தீவிரமாக செயல்பட்டு வரும் அஜித்குமார், ‘அஜித்குமார் ரேசிங்’ என்ற தனது சொந்த பந்தய அணியை நிறுவி பல கார் பந்தயங்களில் பங்கேற்று வருகிறார். குறிப்பாக இந்த அணி துபாய், பெல்ஜியம் உள்ளிட்ட பல நாடுகளில் நடைபெற்ற கார் பந்தயங்களில் கலந்து கொண்டு வெற்றிகளைப் பெற்றதோடு, கோப்பைகளையும் கைப்பற்றியுள்ளது.
இந்நிலையில், ‘அஜித்குமார் ரேசிங்’ அணியின் அதிகாரப்பூர்வ எனர்ஜி பார்ட்னராக ரிலையன்ஸ் குழுமத்தின் ‘கெம்பா’ எனர்ஜி டிரிங்க் நிறுவனம் இணைந்துள்ளது. இந்த ஒப்பந்த அறிவிப்பில் ரிலையன்ஸ் குழுமம், இந்தியாவின் மிகவும் நம்பிக்கைக்குரிய மோட்டார் ஸ்போர்ட்ஸ் அணிகளில் ஒன்றாக அஜித்குமார் ரேசிங் திகழ்கிறது என குறிப்பிட்டு இந்த ஒப்பந்தம் குறித்து தெரிவித்துள்ளது.
