நடிகர் சிலம்பரசன் நடித்த ‘தக் லைப்’ திரைப்படத்திற்குப் பிறகு, அடுத்ததாக இயக்குநர் வெற்றிமாறன் இயக்கும் புதிய படத்தில் நடிக்க உள்ளார். இப்படம் வடசென்னையை மையமாகக் கொண்ட கேங்க்ஸ்டர் கதையாக உருவாகி வருகிறது.
இயக்குநர் வெற்றிமாறன், தனது முந்தைய ‘வடசென்னை’ திரைப்படத்தின் அதே காலகட்டத்தை அடிப்படையாகக் கொண்ட ஒரு படத்தை உருவாக்கி வருகிறார். இப்படத்தில் சிலம்பரசனுடன் சமுத்திரக்கனி, கிஷோர், ஆண்ட்ரியா, இயக்குநர் நெல்சன் உள்ளிட்ட பலர் முக்கிய கதாபாத்திரங்களில் நடித்துள்ளனர். அனிருத் இசையமைக்கும் இந்த படத்தை கலைப்புலி எஸ். தாணு தயாரிக்கிறார்.
சிலம்பரசன் இப்படத்தில் இளமை மற்றும் முதுமை என இரு வெவ்வேறு தோற்றங்களில் நடிப்பதாக கூறப்படுகிறது. இதற்கிடையில், அவரது ‘அரசன்’ திரைப்படத்தின் புரோமோ வீடியோ வெளியிடப்பட்டு ரசிகர்களிடையே பெரும் எதிர்பார்ப்பை ஏற்படுத்தியுள்ளது. மேலும், ‘அரசன்’ படம் தெலுங்கு மொழியிலும் வெளியாக இருப்பது குறிப்பிடத்தக்கது. அதோடு, ‘அரசன்’ படத்தின் படப்பிடிப்புகள் வருகிற 24ஆம் தேதி முதல் தொடங்கவுள்ளதாக தகவல் வெளியாகியுள்ளது. வெற்றிமாறனுடன் இணையும் தனது முதல் படம் என்பதால், சிலம்பரசன் கடுமையான தயாரிப்பில் ஈடுபட்டு வருகிறார். இதனிடையே, அவரது சமீபத்திய ஸ்டைலிஷ் புகைப்படங்கள் இணையத்தில் வைரலாகி வருகின்றன.
