வி.கே. புரடக்ஷன்ஸ் நிறுவனம் மிகுந்த பிரமாண்டத்துடன் தயாரிக்கின்ற ‘படையாண்ட மாவீரா’ திரைப்படத்தில், கதையும் திரைக்கதையும் எழுதி, இயக்கி, நாயகனாகவும் நடித்திருக்கிறார் வ.கௌதமன். இவர் ‘கனவே கலையாதே’, ‘மகிழ்ச்சி’ ஆகிய வெற்றிப் படங்களை தொடர்ந்து, இந்தப் படத்தில் இரண்டாவது முறையாக நாயகனாக நடித்துள்ளார்.
மண்ணையும் மானத்தையும் காக்க, வீரமும் ஈரமும் அறத்தோடு போராடி வாழ்ந்த ஒரு மாவீரரை மையமாகக் கொண்ட உண்மைச் சம்பவத்தின் அடிப்படையில் எடுக்கப்பட்டுள்ள திரைப்படம் இது. இந்தப் படத்தில் இடம்பெறும் ஐந்தாவது பாடலான “நெருப்பு தகிக்கும்” பாடலை இயக்குநரே பாடலாசிரியரிடம் கேட்டுக்கொண்டு பெற்றுள்ளார். இது குறித்து அவர் தனது எக்ஸ் தளத்தில், “கௌதமன் இயக்கும் புரட்சிப் படம் படையாண்ட மாவீரா – அனைத்துப் பாடல்களையும் நான் எழுதியுள்ளேன். ஒவ்வொரு பாடலையும் அவரே வந்து வாங்கி, வாசித்து வழங்கச் சொல்வார். இந்தப் பாடலை வாசிக்கும் பொழுது கண்ணில் கண்ணீர் வடிக்கிறார். கைக்கொடுக்கும்போது கும்பிட்டுக் கொள்கிறார். நன்றியுள்ள ரசிகனுக்கே நன்று பாடல் அமையும்” என உணர்வுபூர்வமாக தெரிவித்துள்ளார்.
இந்த படத்திற்கு இசையமைக்கிறார் ஜி.வி.பிரகாஷ்.படத்தில் வ.கௌதமனுக்கு எதிரியாக மன்சூர் அலிகான், ஆடுகளம் நரேன், பாகுபலி பிரபாகர், வேதாளம் கபீர், மதுசூதனராவ், தீனா என ஆறு வில்லன்கள் மோதுகின்றனர். பரபரப்பான திருப்பங்கள் நிறைந்த இந்தப் படத்தில் மிகவும் உக்கிரமான நான்கு சண்டைக்காட்சிகளை “ஸ்டண்ட்” சில்வா வடிவமைத்துள்ளார். நடனக்காட்சிகளை டான்ஸ் மாஸ்டர் தினேஷ் அமைத்துள்ளார்.
மேலும் முக்கிய கதாப்பாத்திரங்களில் சமுத்திரக்கனி, சரண்யா பொன்வண்ணன், ரெடின் கிங்ஸ்லி, நிழல்கள் ரவி, இளவரசு, தமிழ் கௌதமன், தலைவாசல் விஜய், ஏ.எல். அழகப்பன் ஆகியோர் நடிக்கின்றனர். நாயகியாக பூஜிதா நடித்துள்ளார். இசை ஜி.வி.பிரகாஷ் வழங்கியதுடன், பாடல்களை கவிப்பேரரசு வைரமுத்து எழுதியுள்ளார். ஒளிப்பதிவு கோபி ஜெகதீஸ்வரன், கலை மோகன், வசனம் பாலமுரளி வர்மன், படத்தொகுப்பு ராஜா முகமது, ஸ்டில்ஸ் அன்பு, மக்கள் தொடர்பு நிகில் முருகன் ஆகியோர் கவனித்துள்ளனர்.
இப்படைப்பைப் பற்றி இயக்குநர் வ.கௌதமன் கூறும் போது, “நேர்மையோடும் அறத்தோடும் உருவாக்கப்பட்ட ‘படையாண்ட மாவீரா’, மொழி கடந்து, இனம் கடந்து, மனித மனங்களை வெல்வான். ஆன்மாவை அதிரச் செய்து, உணர்வுகளால் சிலிர்க்க வைக்கும். தற்போது படப்பிடிப்பு முடிந்து, பிந்தைய பணிகள் நடைபெற்று வருகிறது. படம் விரைவில் திரைக்கு வருகிறது” என பெருமிதத்துடன் கூறியுள்ளார்.
