இயக்குனர் வெற்றிமாறன் பொல்லாதவன், விசாரணை, ஆடுகளம், அசுரன், வடசென்னை போன்ற திரைப்படங்கள் அவரது இயக்கத்தில் வெளியான வெற்றிகரமான முக்கியமான படைப்புகளாகும்.கடந்த ஆண்டு வெளியான விடுதலை படத்தில் நடிகர் சூரி கதாநாயகனாகவும் விஜய் சேதுபதி முக்கிய கதாபாத்திரத்தில் இணைந்திருந்தார். மேலும், பவானி ஸ்ரீ, கவுதம் வாசுதேவ் மேனன், சேத்தன் ஆகியோர் முக்கியமான வேடங்களில் நடித்திருந்தனர். இசைஞானி இளையராஜா இந்த படத்திற்கு இசையமைத்தார்.
விடுதலை படம் ரசிகர்களிடையே விமர்சன ரீதியாகவும், வசூல் ரீதியாகவும் மிகச் சிறந்த வரவேற்பைப் பெற்றது. படம் வெளியான பிறகு அதன் பாடல்களும் ரசிகர்களை வெகுவாக கவர்ந்தன. தற்போது, வெற்றிமாறன் விடுதலை திரைப்படத்தின் இரண்டாம் பாகத்தை உருவாக்கி வருகிறார். இந்தப் பாகத்தில் சூரி, விஜய் சேதுபதி ஆகியோருடன் மஞ்சு வாரியர், அட்டகத்தி தினேஷ் உள்ளிட்டோர் முக்கிய வேடங்களில் நடித்துள்ளனர். இந்தப் படத்தை வெற்றிமாறனின் கிராஸ் ரூட் பிலிம் கம்பெனி, ஆர் எஸ் போடெயின்மென்ட், மற்றும் ரெட் ஜெயன்ட் மூவிஸ் ஆகிய நிறுவனங்கள் இணைந்து தயாரிக்கின்றன. மிகுந்த எதிர்பார்ப்புகளுடன் உருவாகியுள்ள இப்படத்தின் பணிகள் இறுதிக்கட்டத்தை எட்டியுள்ளன.
இவ்விரண்டாம் பாகத்தில், விஜய் சேதுபதியின் மனைவியாக மஞ்சு வாரியர் நடிக்கிறார். இவர்களுக்கிடையேயான காட்சிகள் 1960களில் நடைபெறுவது போன்று உருவாக்கப்பட உள்ளதால், அவர்களின் தோற்றங்களை இளமையாகக் காட்ட டீ-ஏஜிங் தொழில்நுட்பத்தை பயன்படுத்துவதில் வெற்றிமாறன் முடிவு செய்துள்ளார். மேலும், நடிகர் எஸ்.ஜே.சூர்யா, விடுதலை – 2 பாகத்தில் சிறப்பு தோற்றத்தில் நடிக்கவுள்ளார் என கூறப்படுகிறது.இந்நிலையில், இப்படம் உலகம் முழுவதும் டிசம்பர் 20-ம் தேதி வெளியிடப்படும் என்று படக்குழு அதிகாரப்பூர்வமாக அறிவித்துள்ளது. அதற்கு முன்னதாக, இப்படத்தின் இசை வெளியீட்டு விழா நவம்பர் 26-ம் தேதி நடத்த திட்டமிடப்பட்டுள்ளதாக என தகவல்கள் வெளியாகியுள்ளன.
