தமிழ் மற்றும் தெலுங்கு திரையுலகில் முன்னணி நட்சத்திரங்களின் பிரம்மாண்டமான படங்களை தயாரித்து, நட்சத்திர தயாரிப்பாளராக உயர்ந்திருப்பவர் ஸ்ரீ வெங்கடேஸ்வரா கிரியேஷன்ஸ் நிறுவனத்தின் தயாரிப்பாளர் தில் ராஜு. இந்நிலையில் தில் ராஜுவுடன் இணைந்து பட தயாரிப்பில் ஈடுபடுகிறார் சென்னை கிழக்கு கடற்கரை சாலையில் பிரம்மாண்டமான படப்பிடிப்பு வளாகம், கட்டுமான நிறுவனம் போன்ற பல துறைகளில் ஈடுபட்டிருக்கும் பிரபல தொழிலதிபர் ஆதித்யா ராம். இவர் ஏற்கனவே நான்கு தெலுங்கு திரைப்படங்களை தயாரித்துள்ளார். சிறிய இடைவெளிக்குப் பிறகு கேம் சேன்ஜர் படத்தின் மூலம் தில் ராஜுவுடன் இணைந்து அனுபவம் மிக்க பட தயாரிப்பிலும் விநியோகத்திலும் ஈடுபடுகிறார். இதற்கான அதிகாரப்பூர்வ அறிவிப்பு வெளியாகியுள்ளது.
தயாரிப்பாளர் ஆதித்யா ராம் கூறுகையில், “எங்கள் தயாரிப்பு நிறுவனமான ஆதித்யா ராம் மூவிஸ் ஏற்கனவே நான்கு தெலுங்கு படங்களை தயாரித்துள்ளது. பிரபாஸ் நடிப்பில் வெளியான ‘ஏக் நிரஞ்சன்’ படத்திற்கு பிறகு தயாரிப்பு பணியில் இருந்து விலகினேன், ரியல் எஸ்டேட் தொழிலில் ஈடுபட விரும்பினேன். அதனால் தயாரிப்பில் தற்காலிக இடைவெளி எடுத்துக் கொண்டேன்.
தயாரிப்பாளரும் நண்பருமான தில் ராஜுவின் தயாரிப்பில் உருவான ‘கேம் சேஞ்சர்’ படத்தில் அவருடன் இணைந்து பணியாற்றி மகிழ்ச்சி அடைகிறேன். இதன் பிறகு தமிழ் மற்றும் பான் இந்தியா அளவிலான திரைப்படங்களையும் தயாரிக்க திட்டமிட்டுள்ளேன். இதற்கான பொருத்தமான கதை, இயக்குநர் போன்ற விஷயங்களை தேர்ந்தெடுக்கும் போது தில் ராஜுவின் அனுபவம் மிக முக்கியம். தெலுங்கு திரையுலகில் மிகப்பெரிய வெற்றி படங்களை உருவாக்கிய அவர், அவருடன் பணியாற்றுவதற்கு கிடைத்த வாய்ப்பை மகிழ்ச்சியுடன் ஏற்றுக்கொண்டேன். ஆதித்யா ராம் குழுமம் திரைப்படத் துறையில் சிறப்பான படைப்புகளை வழங்க உறுதி பெறுகிறேன். அனைவருக்கும் நன்றி,” என்றார்.
