நடிகர் சிவகார்த்திகேயன் நடிப்பில் உருவாகியுள்ள “அமரன்” திரைப்படம் தீபாவளி சிறப்பு வெளியீடாக அக்டோபர் 31 அன்று திரையரங்குகளில் வெளியானது. இந்தப் படத்தை நடிகர் கமல்ஹாசனின் ஆர்கேஎப்ஐ தயாரிப்பு நிறுவனம் தயாரித்துள்ளது. தமிழக ராணுவத்தில் சேவை ஆற்றிய மறைந்த மேஜர் முகுந்த் வரதராஜனின் வாழ்க்கையை அடிப்படையாகக் கொண்டு உருவாக்கப்பட்ட இப்படம் ரசிகர்களிடையே மிகுந்த வரவேற்பைப் பெற்றுள்ளது. இதில் சிவகார்த்திகேயன் மேஜர் முகுந்தாகவும், முகுந்தின் மனைவியாக நடிகை சாய் பல்லவியும் நடித்துள்ளனர். திரையரங்குகளில் அமரன் படத்திற்கு பெரும் வரவேற்பு கிடைத்துள்ளது. முதல் நாளில் இத்திரைப்படம் உலகளவில் 42.3 கோடி ரூபாய் வசூலித்துள்ளதாக படக்குழு அறிவித்துள்ளது.
இந்தச் சூழலில், “அமரன்” படத்தைப் பார்த்து நடிகர் சிம்பு பாராட்டுச் சொல்லியுள்ளார். இதுகுறித்து அவர் தனது எக்ஸ் தளத்தில் வெளியிட்ட பதிவில்,
“அமரன் படத்தை முழுமையாக ரசித்தேன். நடிகர் சிவகார்த்திகேயனும் நடிகை சாய் பல்லவியும் மிகச்சிறந்த நடிப்பைக் கொடுத்துள்ளனர். உண்மை சம்பவத்தை அடிப்படையாகக் கொண்டு படத்தை அழகாக செதுக்கிய இயக்குனர் ராஜ்குமார் பெரியசாமிக்கு பாராட்டுகள். ஜி.வி. பிரகாஷின் இசை ஒவ்வொரு காட்சியையும் அழகுபடுத்தியுள்ளது,” என்று கூறியுள்ளார்.
