‘விடியும் வரை பேசு’ என்ற படத்தின் மூலம் நடிகையாக அறிமுகமானவர் டெல்னா டேவிஸ். அதன்பிறகு ‘பத்ரா’, ’49 ஓ’ உள்ளிட்ட சில தமிழ் மற்றும் மலையாள படங்களில் நடித்தார். கடைசியாக 7 ஆண்டுகளுக்கு முன்பு வெளியான ‘குரங்கு பொம்மை’ படத்தில் நடித்தார். தற்போது சின்னத்திரையில் பிசியாக இருப்பவர் டெல்னா, ‘அன்பே வா’, ‘அபியும் நானும்’, ‘கண்ணான கண்ணே’, ‘தாமரை’ உள்ளிட்ட பல தொடர்களில் நடித்துள்ளார்.
இப்போது அவர் ‘லவ் இங்க்’ என்ற படத்தில் மீண்டும் நாயகியாக நடித்து வருகிறார். ராஜ் அய்யப்பா ஹீரோவாக நடிக்கிறார். அவருடன் யோகி பாபு, திலீபன், விடிவி கணேஷ், முனீஷ்காந்த், அர்ஷத், பட்டிமன்றம் ராஜா, வினோதினி, மாறன், சுபாஷினி கண்ணன், கேபிஒய் வினோத், க்மார்க் ஆண்டனிக் டிஎஸ்ஜி, மவுரிஷ் தாஸ், பிரீதா, வினோத் முன்னா உள்ளிட்டோர் நடிக்கின்றனர். ஏ.எஸ். அர்ஜூனா ஒளிப்பதிவாளர், விஷ்ணு விஜய் இசையமைப்பாளர்.
இயக்குனர் மேகராஜ் தாஸ் இப்படம் பற்றி கூறுகையில், “தங்களுக்கு விருப்பமான நபரின் பெயரையோ அல்லது காதல் சின்னத்தையோ டாட்டூவாக வரைவது ‘லவ் இங்க்’. இதன் மற்றொரு பக்கம் குறித்து சொல்லும் கதையுடன் உருவாகும் படம். அஜித் குமாரின் ‘வலிமை’, அதர்வா முரளியின் ‘100’ உள்ளிட்ட சில படங்களிலும், வெப்தொடர்களிலும் நடித்துள்ள ராஜ் அய்யப்பா ஹீரோவாக நடிக்க, அவரது ஜோடியாக ‘குரங்கு பொம்மை’ டெல்னா டேவிஸ் நடிக்கிறார்.
‘அன்பே வா’ டிவி சீரியலில் டெல்னாவின் நடிப்பைப் பார்த்து, அவர் கதாநாயகியாக நன்றாக பொருந்துவார் என தேர்வு செய்தேன். மேலும், ஹன்சிகாவைப் போன்ற அழகான பெண் நாயகியை தமிழ் சினிமாவில் தற்போது பார்க்க முடியவில்லை. எனவே, என் படத்திற்கு ஒரு மிகச்சிறந்த பெண் நாயகி தேவைப்பட்டார், அதற்காக டெல்னாவை தேர்ந்தெடுத்தேன், என்றார்.
