ஏஜிஎஸ் என்டர்டெயின்மென்ட் தயாரிப்பில், இயக்குநர் வெங்கட் பிரபு இயக்கத்தில் விஜய், மோகன், பிரசாந்த், பிரபுதேவா, அஜ்மல், யோகி பாபு, சினேகா, மீனாட்சி சவுத்ரி, லைலா ஆகியோர் நடித்துள்ள படம் ‘தி கோட்’. இப்படத்தின் டிரைலர் நேற்று வெளியானது, அது ரசிகர்களிடையே நல்ல வரவேற்பைப் பெற்றுள்ளது. இதில் காந்தி என்ற கதாபாத்திரத்தில் விஜய் நடித்துள்ளார், மது அருந்தும் காட்சிகளும் இதில் இடம் பெற்றுள்ளது.
இதுபற்றி ஒரு செய்தியாளர் சந்திப்பில் இயக்குநர் வெங்கட் பிரபுவிடம் கேள்வி எழுப்பப்பட்டது. அதற்கு அவர், காந்தி என்ற பெயர் வைத்தால் குடிக்கக் கூடாது என்று யார் சொன்னார்கள்? என் நெருங்கிய நண்பரின் பெயரும் காந்தி தான். அவரை மையமாக வைத்து தான் கதையில் விஜய்க்கு காந்தி என பெயர் வைத்தேன். ஏன் குழப்பத்தை ஏற்படுத்துகிறீர்கள்? என்றார்.
மேலும் வெங்கட் பிரபு, இந்தக் கதையை முதலில் தயாரிப்பாளர் அர்ச்சனாவிடம் தெரிவித்தேன். நாங்கள் முதலில் கதையைப் பற்றி பேசினோம், பிறகு விஜயிடம் கதை சொல்லும் வாய்ப்பு கிடைத்தது. அதன்பிறகு படமாக உருவாகியது. அமெரிக்காவின் எல்லையில் தான் படப்பிடிப்பு தொடங்கியது. டெட்பூல் & வால்வரின் போன்ற ஹாலிவுட் திரைப்படங்களில் பணியாற்றிய லோலா என்ற வி.எப்.எஸ் கம்பெனி மூலமாகத்தான் இந்தப் படத்தின் வி.எப்.எக்ஸ் காட்சிகள் அமைக்கப்பட்டுள்ளன.
அதுமட்டுமல்லாது, நடிகர் அஜித் ‘தி கோட்’ படத்தின் டிரைலரை பார்த்துவிட்டு “டேய் சூப்பரா இருக்குடா. விஜய்க்கும் படக்குழுவுக்கும் என் வாழ்த்துகளை சொல்லுங்க” என்று மெசேஜ் அனுப்பியுள்ளார். படத்தை முடித்தவுடன் பாடல்கள் எல்லாருக்கும் பிடித்துவிடும். அது விஷூவல் ட்ரீட்டாக இருக்கும். எந்த இடத்திலும் முகம் சுழிக்காத அளவிற்கு இந்த திரைப்படம் இருக்கும்” என அவர் பேசியுள்ளார்.
