மங்காத்தா திரைப்படத்தின் மூலம் மக்கள் மனதில் இடம்பிடித்தவர் நடிகர் மஹத் ராகவேந்திரா. அவர் ஜில்லா உள்ளிட்ட படங்களில் நடித்துள்ளார். 2022 ஆம் ஆண்டு வெளிவந்த டபுள் XL என்ற இந்தி திரைப்படத்தில் முக்கிய கதாபாத்திரத்தில் நடித்தார். சமீபத்தில் அவர் மாருதி நகர் போலிஸ் ஸ்டேஷன் என்ற திரைப்படத்தில் நடித்துள்ளார். தற்போது மஹத் ‘காதலே காதலே’ என்ற புதிய படத்தில் நடித்துள்ளார்.
இந்த படத்தை அறிமுக இயக்குநர் ஆர். பிரேம்நாத் இயக்கியுள்ளார். இவர் மறைந்த பிரபல இயக்குநர் கே.வி. ஆனந்தின் உதவி இயக்குநராக பணியாற்றியவர் என்பது குறிப்பிடத்தக்கது. இந்த படத்தில் இக்காலத்து இளைஞர்களின் காதல் மற்றும் பொழுதுபோக்கு அம்சங்கள் மையமாக உள்ளது.
மீனாட்சி இந்த படத்தில் கதாநாயகியாக நடித்துள்ளார். மஹத்துடன் இணைந்து பாரதிராஜா, விடிவி கணேஷ், ரவீனா, புகழ், நாசர் உள்ளிட்ட பலரும் நடித்துள்ளனர். விஷால் சந்திரசேகர் இசையமைத்த ‘காதலே காதலே’ படத்தை ஸ்ரீ வாரி பிலிம் நிறுவனம் தயாரித்துள்ளது. படத்தின் பாடல்களின் உரிமைகளை சரிகமா நிறுவனம் பெற்றுள்ளது. தற்போது, இந்த படத்தின் போஸ்ட் ப்ரொடக்ஷன் பணிகள் தீவிரமாக நடைபெற்று வருகின்றன. திரைப்படம் விரைவில் திரையரங்குகளில் வெளியிடப்படும் என எதிர்பார்க்கப்படுகிறது.
