ஷங்கர் இயக்கத்தில், கமல்ஹாசன் நடித்துள்ள ‘இந்தியன் 2’ படம் இன்று(ஜூலை 12) உலகம் முழுவதும் வெளியாகி உள்ளது. படத்தின் முடிவில் ‘இந்தியன் 3’ படத்திற்கான முன்னோட்டக் காட்சிகள் இடம் பெற்றுள்ளது.
அதில் சுதந்திரப் போராட்டக் காலக் காட்சிகள் இடம் பெற்றுள்ளது. முதல் பாகத்தில் சேனாபதி ஒரு சுதந்திரப் போராட்ட வீரர். இந்திய நாட்டின் விடுதலைக்காக ஆயுதம் ஏந்திப் போராடிய நேதாஜியின் ராணுவத்தில் இருந்தவர் என சில காட்சிகள் மட்டும் இடம் பெற்றிருந்தது. அதை விரிவுபடுத்தி சேனாபதியின் அப்பா வீரசேகரன் கதாபாத்திரமும் ‘இந்தியன் 3’ல் வர உள்ளது.
முதல் பாகத்தில் மகன் சந்துரு, அப்பா சேனாபதி, இரண்டாம் பாகத்தில் அப்பா சேனாபதி மட்டும் இடம் பெற்ற நிலையில், மூன்றாம் பாகத்தில் சேனாபதி மற்றும் அவருடைய அப்பா வீரசேகரன் இடம் பெற உள்ளார்கள். அது மட்டுமல்ல வீரசேகரன் மனைவியாக காஜல் அகர்வால் நடித்திருக்கிறார். VFX பணிகள் விரைவில் முடிவடைந்தால் இன்னும் 6 மாதங்களில் இந்தியன் 3 திரைப்படம் வெளியாகும் என ஒரு பேட்டியில் இயக்குனர் ஷங்கர் கூறியிருந்தது குறிப்பிடத்தக்கது.
