இந்திய மைக்கேல் ஜாக்சன் என்று ரசிகர்களால் அழைக்கப்படும் பிரபு தேவா, தற்போது வெங்கட் பிரபு இயக்கத்தில் விஜய் நடிக்கும் ‘தி கிரேட்டஸ்ட் ஆப் ஆல் டைம்’ படத்தில் நடித்து வருகிறார். இப்படம் செப்டம்பரில் வெளியாக உள்ளது. மேலும், அவர் நடித்துள்ள ‘பேட்ட ராப்’ படமும் விரைவில் வெளியாக உள்ளது.
இந்தப் படங்களுக்கு அடுத்ததாக அவர் நடிக்கும் புதிய படத்தின் அறிவிப்பு வெளியாகியுள்ளது. இந்தப் படத்திற்கு ‘சிங்காநல்லூர் சிக்னல்’ என்று பெயரிடப்பட்டுள்ளது. ‘ஜோ’ படத்தில் நடித்த பாவ்ய திரிகா இந்தப் படத்தில் கதாநாயகியாக நடிக்கிறார். மேலும் மலையாள நடிகர் ஷைன் டாம் சாக்கோ மற்றும் ஸ்ரீமன் முக்கிய கதாபாத்திரங்களில் நடிக்க உள்ளனர். இசையமைப்பாளராக யுவன் சங்கர் ராஜா பணிபுரிகிறார்.
இந்தப் படத்தின் பர்ஸ்ட் லுக் போஸ்டரை இயக்குனர் கார்த்திக் சுப்புராஜ் தனது எக்ஸ் பக்கத்தில் வெளியிட்டுள்ளார். அதில், பிரபு தேவா டிராபிக் போலீஸ் உடையில் உள்ளார். இதன் மூலம், இப்படத்தில் அவர் டிராபிக் போலீசாக நடிக்கிறார் என்பது தெரிகிறது.
