நடிகர் சசிகுமார் மற்றும் நடிகை சிம்ரன் இணைந்து நடித்த ‘டூரிஸ்ட் பேமிலி’ திரைப்படத்தின் மூலம் இயக்குநராக அறிமுகமானவர் அபிஷன் ஜீவிந்த். குடும்ப உணர்வுகளை மையமாகக் கொண்டு உருவான அந்த திரைப்படம் ரசிகர்களிடையே மிகப்பெரிய வரவேற்பைப் பெற்று, வசூல் ரீதியாகவும் குறிப்பிடத்தக்க சாதனையை படைத்தது. முதல் படத்திலேயே வெற்றியைப் பெற்ற அபிஷன் ஜீவிந்த், அதன் பின்னர் ‘வித் லவ்’ என்ற திரைப்படத்தில் கதாநாயகனாகவும் நடித்தார். அந்த திரைப்படமும் ரசிகர்களின் ஆதரவை பெற்று வெற்றி பெற்றது குறிப்பிடத்தக்கது.
இந்த நிலையில், தற்போது தனது அடுத்த திரைப்படத்தில் கதாநாயகனாக நடிக்க அவர் தயாராகியுள்ளார். இந்த படத்தை அறிமுக இயக்குநரான கவுதமன் சிவராமன் இயக்குகிறார். இப்படத்தில் கன்னட திரையுலகின் முன்னணி நடிகரான சிவராஜ்குமார் முக்கியமான கதாபாத்திரத்தில் நடிக்கிறார். குடும்ப உறவுகள் மற்றும் உணர்வுகளை மையமாகக் கொண்ட எமோஷனல் பேமிலி என்டர்டெயின்மென்ட் கதைக்களத்தில் இந்த திரைப்படம் உருவாக உள்ளது. மேலும், தமிழ் மட்டுமின்றி கன்னடம் மற்றும் தெலுங்கு ஆகிய மூன்று மொழிகளிலும் இந்த திரைப்படம் தயாரிக்கப்பட உள்ளது. இப்படத்தை டிராமா கம்பெனி நிறுவனம் தயாரிக்கிறது.
இந்த திரைப்படத்தில் இரண்டு கதாநாயகிகள் இடம்பெறுகின்றனர். அவர்களில் ஒருவராக தெலுங்கில் வெளியான ‘லிட்டில் ஹார்ட்ஸ்’ திரைப்படத்தில் நடித்த ஷிவானி நகரம் நடிக்கிறார். இந்த படத்தின் மூலம் அவர் தமிழ்த் திரையுலகில் கதாநாயகியாக அறிமுகமாகிறார். மற்றொரு கதாநாயகியாக ‘டூரிஸ்ட் பேமிலி’ திரைப்படத்தின் மூலம் ரசிகர்களிடையே கவனம் பெற்ற யோக லட்சுமி நடிக்கிறார். சமீபத்தில் சென்னை நகரில் பூஜையுடன் இப்படத்தின் படப்பிடிப்பு தொடங்கப்பட்டுள்ளது. மேலும், இந்த படத்தின் தலைப்பு விரைவில் அதிகாரப்பூர்வமாக அறிவிக்கப்படும் என படக்குழு தெரிவித்துள்ளது.
—
