கிருத்திகா உதயநிதி இயக்கத்தில் ஜெயம் ரவி மற்றும் நித்யா மேனன் நடித்துள்ள “காதலிக்க நேரமில்லை” படம் இந்த பொங்கல் திருநாளில் திரையரங்குகளில் வெளியாக உள்ளது. இந்த படத்தின் புரொமோஷன் நிகழ்ச்சிகளில் நித்யா மேனன் சிறப்பாக கலந்து கொண்டு வருகிறார். அந்த நேரத்தில், அவர் நடித்து வரும் தனுஷின் இயக்கத்தில் உருவாகும் “இட்லி கடை” படத்தைப் பற்றி கேள்வி எழுப்பப்பட்டது.
அதற்கு பதிலளித்த நித்யா மேனன் கூறியதாவது, “‘காதலிக்க நேரமில்லை’ படத்திற்கும் ‘இட்லி கடை’ படத்திற்கும் முழுமையான எதிர்மறையான தன்மையிலான வேறுபாடு இருக்கும். இந்தப் படத்திற்காக மிகவும் ஆர்வமாக இருக்கிறேன். எதையும் முன்கூட்டியே திட்டமிடாமல் இருக்கும்போது, சில விஷயங்கள் தானாகவே நிகழ்ந்து விடுகின்றன. அப்படமும் இந்த ஆண்டில் வெளியாக இருக்கிறது என்று நினைக்கும் போது மிகவும் மகிழ்ச்சியாக உள்ளது” என்று தெரிவித்தார்.
மேலும், “‘இட்லி கடை’ படத்தில் நீங்கள் என்னை சந்திக்கப்போகும் கதாபாத்திரம் யாராலும் சுலபமாக யூகிக்க முடியாது. ‘நித்யா மேனனை இப்படியுமா பார்க்க முடியும்?’ என்று நீங்கள் ஆச்சர்யப்படுவீர்கள். இந்தப் படம் மிகவும் உணர்ச்சிகரமான, எமோஷனலான ஒன்று. இதைப் பார்த்தவர்கள் கண்டிப்பாக கலங்கிவிடுவார்கள்” என்று தனது எண்ணங்களை பகிர்ந்துகொண்டார்.
