இயக்குநர் பா. ரஞ்சித் இயக்கத்தில் விக்ரம் நடித்துள்ள படம் “தங்கலான்”. மாளவிகா மோகனன், பார்வதி, பசுபதி மற்றும் பலர் இந்த படத்தில் நடித்துள்ளனர். ஜி.வி. பிரகாஷ் குமார் இசையமைத்துள்ள தங்கலான் படத்தின் படப்பிடிப்பு பணிகள் முடிந்து, தற்போது ரிலீஸுக்கு தயாராகியுள்ளது.
இந்த நிலையில், தங்கலான் படத்தின் டிரைலர் அண்மையில் வெளியாகி மக்களின் கவனத்தை ஈர்த்தது. இந்த படம் தமிழ், தெலுங்கு, மலையாளம், கன்னடம் மற்றும் இந்தி ஆகிய மொழிகளில் ரிலீசாக இருக்கிறது. திரைப்படம் வரும் ஆகஸ்ட் 15 ஆம் தேதி வெளியாகவுள்ளது. சமீபத்தில் வெளியான படத்தின் டிரைலரும் படத்தின் முதல் பாடலான மேனா மினிக்கி மக்களிடையே நல்ல வரவேற்பை பெற்றது.
படம் வெளியாக இன்னும் சில வாரங்களே இருப்பதால் படத்தின் ப்ரோமோஷன் பணிகளில் ஈடுப்பட்டு வருகின்றனர் படக்குழுவினர். இதையொட்டி படத்தின் முக்கிய பிரபலங்களான விக்ரம், மாளவிகா மோகனன், பார்வதி, பா. ரஞ்சித், ஜி.வி. பிரகாஷ் மற்றும் ஞானவேல்ராஜா கேரளாவில் ப்ரோமோஷன் பணிக்காக சென்றனர்.
கேரளாவின் ரசிகர்கள் படக்குழுவினருக்கு மிகப்பெரிய வரவேற்பு கொடுத்தனர். மேலும் விக்ரம் அங்கு தனியார் மால் ஒன்றின் திறப்பு விழாவில் பங்கேற்றார். அப்போது ரசிகர்கள் கடல் போல் திரண்டது பிரமிக்க வைத்தது . சீயான் விக்ரமிற்கு கேரளா ரசிகர்கள் அமோக ஆதரவை கொடுத்தனர். விக்ரம் இந்த அன்பிற்கு நன்றி தெரிவிக்கும் வகையில் சமூக வலைத்தளத்தில் பதிவு ஒன்றை பதிவிட்டுள்ளார். அதில் மிகவும் ஸ்டைலிஷாகவும் பிங்க் கலர் கோட் சூட்டில் மிரட்டியுள்ளார். இந்த புகைப்படம் தற்போது இணையத்தில் வைரலாகி வருகிறது.
