வெங்கட் பிரபு இயக்கத்தில், விஜய் நடிப்பில் உருவாகியுள்ள ‛தி கிரேட்டஸ்ட் ஆப் ஆல் டைம்’ படம் இன்று (செப்டம்பர் 5) உலகம் முழுவதும் வெளியானது. சுருக்கமாக ‛தி கோட்’ என்று அழைக்கப்படும் இப்படத்தில் பிரபுதேவா, பிரசாந்த், மோகன், அஜ்மல், சினேகா, லைலா, மீனாட்சி சவுத்ரி, வைபவ் உள்ளிட்ட பல திரை நட்சத்திரங்கள் நடித்துள்ளனர். யுவன் ஷங்கர் ராஜா இப்படத்திற்கு இசையமைத்துள்ளார். ஏஜிஎஸ் நிறுவனம் தயாரித்துள்ளது.
அதிரடி ஆக்ஷன் மற்றும் பல திருப்பங்களுடன் இந்த படம் உருவாகியுள்ளது. விஜய் அரசியல் கட்சியை துவங்கிய பின்னர் இப்படம் வெளியாவதால் இதற்கு அதிக எதிர்பார்ப்பு இருந்தது. அந்த எதிர்பார்ப்பை ஒரு அளவுக்கு பூர்த்தி செய்வதாக ரசிகர்கள் கூறுகின்றனர். தமிழ்நாட்டில் சுமார் 1000 தியேட்டர்களில் கோட் படம் வெளியாகியுள்ளது. தமிழ்நாட்டில் காலை 9 மணிக்கு தான் முதல் காட்சி துவங்கியது. அதே சமயம், கேரளா, கர்நாடகா போன்ற பிற மாநிலங்களில் காலை 4 மணி, 5 மணிக்கே காட்சிகள் துவங்கியதால், படத்தின் ரிசல்ட் வெளிவந்துவிட்டது. கோட் படம் வெளியான தியேட்டர்களில் ரசிகர்கள் பட்டாசு வெடித்து, ஆட்டம், பாட்டு என தங்களது கொண்டாட்டங்களை வெளிப்படுத்தினர்.
‛கோட்’ படத்தில் ஏராளமான திருப்பங்கள் இருப்பதாக ரசிகர்கள் தெரிவிக்கின்றனர். மேலும், விஜயகாந்த், சிவகார்த்திகேயன், திரிஷா உள்ளிட்டோர் சிறப்பு தோற்றத்தில் நடித்துள்ளதாகவும் ரசிகர்கள் குறிப்பிட்டு வருகின்றனர்.
