இயக்குனர் வெற்றிமாறன், பொல்லாதவன், விசாரணை, ஆடுகளம், அசுரன், வடசென்னை போன்ற பல வெற்றி படங்களை இயக்கியதன் மூலம் ரசிகர்கள் மனதில் நிலையான இடம் பிடித்துள்ளார். அவர் இயக்கிய அனைத்து திரைப்படங்களும் வெற்றி பெற்றதால், அவர் இயக்கும் புதிய படங்களுக்கு எப்போதும் மக்களின் எதிர்பார்ப்பு அதிகமாகவே இருக்கும்.
2023 ஆம் ஆண்டு சூரி மற்றும் விஜய் சேதுபதி நடிப்பில் அவர் இயக்கிய விடுதலை திரைப்படம் வெளியாகியது. இந்த படத்தின் முதல் பாகத்தில் சூரி, விஜய் சேதுபதியுடன் கௌதம் வாசுதேவ் மேனன், சேத்தன், பவானி ஸ்ரீ, இளவரசு போன்ற பலர் நடித்திருந்தனர்.
இந்த படம் ரசிகர்களிடம் நல்ல வரவேற்பை பெற்று பல தரப்பினரால் பாராட்டப்பட்டது. இளையராஜாவின் இசையில் வெளியான பாடல்களும் ரசிகர்களை கவர்ந்தன. இதனை தொடர்ந்து, வெற்றிமாறன் விடுதலை இரண்டாம் பாகத்தை இயக்கி வருகிறார். இதில் சூரி, விஜய் சேதுபதி, மஞ்சு வாரியர், அட்டக்கத்தி தினேஷ் ஆகியோர் நடிக்கின்றனர். மேலும் எஸ் ஜே சூர்யா நடிப்பதாகவும் தகவல் வெளியாகியுள்ளது.
விடுதலை பாகம் ஒன்று பல சர்வதேச திரைப்பட விழாக்களில் திரையிடப்பட்டு மக்களின் பாராட்டைப் பெற்றது.விடுதலை 2 படப்பிடிப்பு ஏற்கனவே தொடங்கி பல கட்டங்களாக நடைபெற்று வருகிறது.
இப்போது ரிலீஸ் குறித்த புதிய தகவல் கிடைத்துள்ளது. அதாவது, விடுதலை 2 திரைப்படத்தை 2024 தீபாவளிக்கு வெளியிட பட குழுவினர் திட்டமிட்டு வருவதாக தகவல் வெளியாகி உள்ளது. இருப்பினும், இது தொடர்பான அதிகாரப்பூர்வ அறிவிப்பு விரைவில் வெளிவரும் என்று எதிர்பார்க்கப்படுகிறது.
ஏற்கனவே விடாமுயற்சி, கங்குவா, கிஸ், எல்.ஐ.சி போன்ற திரைப்படங்கள் தீபாவளிக்கு வெளியாக உள்ளதால், விடுதலை 2 படமும் அதே நேரத்தில் வெளியாவதால் வரும் தீபாவளிக்கு பெரிய போட்டி இருக்கும் என எதிர்பார்க்கப்படுகிறது.
