பிக்பாஸ் நிகழ்ச்சியின் மூலம் புகழ்பெற்றவர் ஆரவ். திரைப்படத்தில் பெரிய அளவில் சாதிக்க முடியவில்லை. சில படங்களில் நாயகனாக நடித்திருந்தாலும், அந்தப் படங்கள் போதிய வரவேற்பை பெறவில்லை. உதயநிதி நடித்த ‘கலகத் தலைவன்’ படத்தில் வில்லனாக நடித்தார். இதையடுத்து, அஜித் நடிக்கும் ‘விடாமுயற்சி’ படத்தில் வில்லனாக நடித்து வருகிறார். ‘கலகத் தலைவன்’ படத்தில் வில்லனாக அவரை அறிமுகப்படுத்திய மகிழ் திருமேனி, ‘விடாமுயற்சி’ படத்திலும் அவரை வில்லனாக தேர்ந்தெடுத்துள்ளார்.
தற்போது வில்லனாக ஆரவ்வின் தோற்றம் வெளியிடப்பட்டுள்ளது. ஆரவ் வில்லனாக நடிப்பது குறித்து மகிழ் திருமேனி கூறியதாவது: “பல கதைகளுடனும் திருப்பங்களுடனும் வரும் வில்லன் மைக்கேல் நிச்சயம் உங்கள் கவனத்தைக் கவர்வான். ‘மைக்கேல்’ கதாபாத்திரத்தை உருவாக்கி முடித்ததும், இந்திய திரையுலகில் உள்ள பல பெரிய நடிகர்களின் பெயர்கள் தோன்றின. ஆனால், ஆரவ்வின் திறமையை நான் முதன்மையாக நினைத்தேன்.
‘கலகத் தலைவன்’ படத்தின் போதே அவரது அர்ப்பணிப்பை நான் பார்த்திருந்தேன். அதுதான் இந்தக் கதாபாத்திரத்திற்கு அவரை தேர்வு செய்ய ஊக்கமாயிற்று. ஆரவ்வின் பெயரை அஜித் சாரிடம் நான் சொன்னபோது, “இயக்குநரின் தேர்வில் தலையிடுவதில்லை” என்று மகிழ்ச்சியுடன் ஒப்புக் கொண்டார். என்னுடைய தேர்வு சரியானது என்று ஆரவ்வும் நிரூபித்தார். சில ஷெட்யூல் முடிந்த பிறகு, அஜித்தும் ஆரவின் நடிப்பு குறித்து திருப்தி வெளியிட்டார்,” என்றார் மகிழ் திருமேனி.
‘விடாமுயற்சி’ படத்தின் பெரும்பாலான படப்பிடிப்பு அஜர்பைஜானில் நடந்து முடிந்துள்ளது. இதன் இறுதிக் கட்டப் படப்பிடிப்பு தற்போது ஐதராபாத்தில் விறுவிறுப்பாக நடந்து வருகிறது.’விடாமுயற்சி’ படத்தில் த்ரிஷா கதாநாயகியாக நடிக்க, அர்ஜூன் முக்கிய வில்லனாக நடிக்கிறார். ரெஜினா, நிகில், ரவி ராகவேந்திரா, சஞ்சய், தஸ்ரதி, ரம்யா, காசிம், ஜவன்ஷிர், ரஷாத் சபராலியேவ், விதாதி ஹசனோவ், துரல் மற்றும் பலர் முக்கிய கதாபாத்திரங்களில் நடிக்கின்றனர். அனிருத் இசையமைக்கிறார், ஓம் பிரகாஷ் ஒளிப்பதிவு செய்கிறார், லைகா நிறுவனம் தயாரிக்கிறது.
