தமிழ் திரைப்பட உலகில் ‘கோமாளி’ படத்தின் மூலம் இயக்குனராக அறிமுகமான பிரதீப் ரங்கநாதன், பின்னர் ‘லவ் டுடே’ திரைப்படத்தில் கதாநாயகனாக நடித்தார். இந்த படத்தின் மூலம் ரசிகர்களை வெகுவாகக் கவர்ந்தார். அதன் பின்னர், அவர் விக்னேஷ் சிவன் இயக்கிய ‘லவ் இன்சூரன்ஸ் கம்பெனி’ படத்திலும், அஸ்வத் மாரிமுத்து இயக்கிய ‘டிராகன்’ படத்திலும் நடித்துள்ளார்.
ஏஜிஎஸ் நிறுவனம் தயாரித்த ‘டிராகன்’ படத்திற்கு, இசையமைப்பாளர் லியோன் ஜேம்ஸ் இசையமைத்துள்ளார். இதில் கயடு லோஹர், விஜே சித்து, ஹர்ஷத், சினேகா உள்ளிட்ட பலர் நடித்துள்ளனர். மேலும், புகழ்பெற்ற இயக்குனர்கள் மிஷ்கின் மற்றும் கவுதம் வாசுதேவ் மேனன் ஆகியோரும் முக்கியமான கதாபாத்திரங்களில் தோன்றியுள்ளனர்.
இந்த திரைப்படம் வருகிற 21-ம் தேதி வெளியிடப்படும் என அறிவிக்கப்பட்டுள்ளது. அதற்கு முன்னதாக, நேற்று இப்படத்தின் டிரெய்லர் வெளியிடப்பட்டது. டிரெய்லர் வெளியீட்டு விழாவிற்குப் பிறகு, படக்குழு செய்தியாளர்களுடன் சந்திப்பு நடத்தியது. அப்போது, ‘டிராகன்’ படத்தில் முத்தக்காட்சி இடம்பெற்றிருப்பது குறித்து ஒரு கேள்வி எழுப்பப்பட்டது. இதற்கு பதிலளித்த பிரதீப் ரங்கநாதன், ‘முதலில், இந்த படத்தில் முத்தக் காட்சி தேவையில்லை என இயக்குனரிடம் தெரிவித்தேன். ஆனால், படத்தின் கதைக்களத்திற்குத் தேவையான ஒரு பகுதி என்பதால் அதனைச் சேர்க்க வேண்டியதாகிவிட்டது’ என விளக்கமளித்தார்.
