தெலுங்கு சினிமாவின் முன்னணி நடிகர்களில் ஒருவராக விளங்குபவர் விஜய் தேவரகொண்டா. கீதா கோவிந்தம், அர்ஜுன் ரெட்டி போன்ற வெற்றிப் படங்கள் மூலம் ரசிகர்களின் மனதில் இடம் பிடித்தவர். அவர் சமீபத்தில் பேமிலி ஸ்டார் திரைப்படத்தில் நடித்திருந்தார்.
தற்போது விஜய் தேவரகொண்டா தனது 12-வது திரைப்படத்தில் நடித்து வருகிறார். தற்காலிகமாக விடி 12 எனப் பெயரிடப்பட்டுள்ள இந்தப் படத்தை கவுதம் தின்னனுரி இயக்க, சித்தாரா என்டர்டெயின்மெண்ட் நிறுவனம் தயாரிக்கிறது. அனிருத் இசையமைக்க, நடிகை பாக்யஸ்ரீ போர்ஸ் இந்தப் படத்தில் கதாநாயகியாக நடிக்கிறார்.
படப்பிடிப்பு தற்போது விறுவிறுப்பாக நடைபெற்று வரும் நிலையில், இப்படம் இரண்டு பாகங்களாக உருவாகும் என தயாரிப்பாளர் நாக வம்சி தெரிவித்துள்ளார். இது குறித்து அவர் கூறியதாவது, “இது இரண்டு பாகங்களாக எடுப்பதற்கான கதை அல்ல. ஆனால், ஸ்கிரிப்ட் பணியின் போது இரண்டு பகுதிகளாகப் பிரிக்கப்பட்டது. இரண்டாம் பாகத்தை எடுக்காவிட்டாலும் பிரச்சினை இல்லை, ஏனெனில் இரண்டுமே தனித்தனி கதைகள். முதல் பாகமே முழுமையானதாக இருக்கும்,” என்று கூறினார். இப்படம் அடுத்த ஆண்டு மார்ச் 28-ம் தேதி வெளியாக உள்ளதாக அறிவிக்கப்பட்டுள்ளது.
