2018ஆம் ஆண்டு வெளியான பரியேறும் பெருமாள் மூலம் இயக்குநராக அறிமுகமான மாரி செல்வராஜ், பின்னர் தனுஷ் நடித்த கர்ணன், உதயநிதி ஸ்டாலின் நடித்த மாமன்னன், வாழை போன்ற படங்களை இயக்கியுள்ளார்.
இதையடுத்து ஆதித்யா வர்மா படத்தின் மூலம் சினிமாவில் அறிமுகமான நடிகர் துருவ் விக்ரமை வைத்து பைசன் என்ற படத்தை இயக்கியுள்ளார். பா.ரஞ்சித்தின் நீலம் ஸ்டுடியோஸ் மற்றும் அப்ளாஸ் என்டர்டெயின்மெண்ட் இணைந்து இப்படத்தை தயாரித்துள்ளன. இந்த படத்தில் அனுபமா பரமேஸ்வரன், ரெஜிஷா விஜயன், பசுபதி, கலையரசன் உள்ளிட்ட பலரும் நடித்துள்ளனர்.
வருகிற அக்டோபர் 17-ஆம் தேதி தீபாவளி பண்டிகையையொட்டி படம் வெளியாகிறது. இதற்கிடையில், இப்படத்தின் தீக்கொளுத்தி, சீனிக்கல்லு போன்ற பாடல்கள் ஏற்கனவே வெளிவந்து வரவேற்பைப் பெற்றன. தற்போது பைசன் படத்தின் நான்காவது பாடலான தென் நாடு வெளியிடப்பட்டுள்ளது. இந்த பாடலின் வரிகளை இயக்குநர் மாரி செல்வராஜே எழுதியுள்ளார். நிவாஸ் கே. பிரசன்னா இசையமைத்த இந்த பாடலை சத்யன் பாடியுள்ளார்.
