நடிகர் ரஜினிகாந்தும் இயக்குநர் நெல்சனும் இணைந்து நடித்த படம் “ஜெயிலர்.” இந்த படம் ரசிகர்களிடையே மிகுந்த வரவேற்பைப் பெற்றது. அதேசமயம், வசூலில் பல கோடிகள் சம்பாதித்தும் சாதனை படைத்தது. இந்நிலையில், ஜெயிலர் வெற்றியைத் தொடர்ந்து, இந்தப் படத்தின் இரண்டாம் பாகம் உருவாக இருப்பதாக படக்குழு சமீபத்தில் வெளியிட்ட ப்ரோமோ வீடியோவின் மூலம் அறிவித்தது.
தற்போது இந்தப் படத்தின் படப்பிடிப்பு கோவையையும் அதன் சுற்றியுள்ள பகுதிகளிலும் நடைபெற்று வருகிறது. நேற்று நடிகர் ரஜினிகாந்த் கோவை விமான நிலையத்தில் செய்தியாளர்களை சந்தித்தார். மேலும், இன்று கேரளாவின் அட்டப்பாடி மலைத் தொடரில் படப்பிடிப்பு நடைபெற்று வருகிறது. இதில், ரஜினிகாந்தின் மருமகளாக நடிக்கும் மிர்னா இந்த தகவலை தனது இன்ஸ்டாகிராம் பக்கத்தில் பகிர்ந்துள்ளார்.
ஜெயிலர் 2 படத்திற்கு இசையமைப்பாளராக அனிருத் பணியாற்றுகிறார். இந்தப் படத்தையும் சன் பிக்சர்ஸ் நிறுவனமே தயாரிக்கிறது. இதற்குமுன் இப்படம் குறித்த அறிவிப்பு வீடியோவாக வெளியானது. அந்த வீடியோவுக்கும் ரசிகர்கள் மத்தியில் நல்ல வரவேற்பு கிடைத்தது என்பதும் குறிப்பிடத்தக்கது.
