மறைந்த முன்னணி நடிகர் விஜயகாந்த் அவர்களின் மகனான சண்முக பாண்டியன் நடிப்பில் சமீபத்தில் வெளியான ‘படை தலைவன்’ திரைப்படம், ரசிகர்களிடையே கலவையான விமர்சனங்களை பெற்றது. இந்த படத்தை தொடர்ந்து, சினிமாவில் நகைச்சுவை திரைப்படங்களை உருவாக்குவதில் தனிச்சிறப்பை பெற்ற இயக்குநர் பொன்ராம் இயக்கத்தில் உருவாகியுள்ள ‘கொம்புசீவி’ திரைப்படத்தில் சண்முக பாண்டியன் நடித்திருக்கிறார்.
இந்தப் படத்தில், சண்முக பாண்டியனுடன் சேர்ந்து, நடிகர் சரத்குமார், தார்னிகா, காளி வெங்கட் மற்றும் கல்கி ராஜா ஆகியோர் முக்கியமான கதாப்பாத்திரங்களில் நடித்துள்ளனர். இப்படத்திற்கு பிரபல இசையமைப்பாளரான யுவன் ஷங்கர் ராஜா இசையமைத்து வருகிறார்.
‘கொம்புசீவி’ திரைப்படத்தின் கதை, 1996 ஆம் ஆண்டில் உசிலம்பட்டி, ஆண்டிபட்டி மற்றும் வைகை அணை பகுதியில் நடைபெற்ற சம்பவங்களை மையமாகக் கொண்டு உருவாக்கப்பட்டுள்ளதாக தகவல் வெளியாகியுள்ளது. இப்படத்தின் படப்பிடிப்பு சமீபத்தில் நிறைவடைந்தது.
தற்போது இப்படத்தின் பிந்தைய தயாரிப்பு பணிகள் (போஸ்ட் புரொடக்ஷன்) முழுவீச்சில் நடைபெற்று வருகின்றன. இதற்கிடையில், இப்படத்தின் தயாரிப்பு நிறுவனமான ஸ்டார் நிறுவனம், ‘கொம்புசீவி’ திரைப்படத்தின் மேக்கிங் வீடியோவையும் வெளியிட்டுள்ளது. மேலும், இந்த திரைப்படம் விரைவில் திரைக்கு வரப்போகிறது என்றும் அதிகாரப்பூர்வமாக அறிவிக்கப்பட்டுள்ளது.
