தமிழ் திரைப்படத் துறையில் முன்னணி இசையமைப்பாளர்களில் ஒருவர் ஜி.வி. பிரகாஷ் குமார். அவர் தொடர்ந்து பல்வேறு மொழிகளில் முன்னணி திரைப்படங்களுக்கு இசையமைத்து வருகிறார். இசை மட்டுமல்லாமல், நடிகராகவும் கவனம் செலுத்தி வருகிறார். சமீபத்தில் அவரது நடிப்பில் வெளியான ‘கிங்ஸ்டன்’ திரைப்படம் கலவையான விமர்சனங்களை பெற்றது.
அதைத் தொடர்ந்து, ஜி.வி. பிரகாஷ் ‘பிளாக்மெயில்’ என்ற படத்தில் கதாநாயகனாக நடித்துள்ளார். இந்த படத்தை “இரவுக்கு ஆயிரம் கண்கள்”, “கண்ணை நம்பாதே” போன்ற படங்களை இயக்கிய இயக்குனர் மு.மாறன் இயக்கியுள்ளார். இப்படத்தில் கதாநாயகியாக தேஜு அஸ்வினி நடித்துள்ளார். மேலும், பிந்து மாதவி, வேட்டை முத்துக்குமார், ரெடின் கிங்ஸ்லி, ரமேஷ் திலக் மற்றும் ஹரி பிரியா ஆகியோர் முக்கியமான கதாப்பாத்திரங்களில் நடித்துள்ளனர்.
சாம் சி.எஸ் இசையமைத்துள்ள ‘பிளாக்மெயில்’ திரைப்படம் முதலில் ஆகஸ்ட் 1ம் தேதி வெளியாவது என அறிவிக்கப்பட்டிருந்த நிலையில், தற்பொழுது அந்த வெளியீட்டுத் தேதி ஒத்திவைக்கப்பட்டதாக தகவல்கள் வெளியாகியுள்ளன. புதிய வெளியீட்டுத் தேதி விரைவில் அறிவிக்கப்படும் என எதிர்பார்க்கப்படுகிறது.
