‘தி காஷ்மீர் ஃபைல்ஸ்’ படத்தினை தயாரித்த அபிஷேக் அகர்வால் ஆர்ட்ஸ், ‘தி தில்லி ஃபைல்ஸ்’ என்ற படத்தையும் தயாரித்துள்ளது.காஷ்மீர் பண்டிட்டுகள் குறித்துத் தயாரிக்கப்பட்ட தி காஷ்மீர் ஃபைல்ஸ் திரைப்படம் வெளியானதும் மிகுந்த சர்ச்சையை ஏற்படுத்தியது. விவேக் ரஞ்சன் அக்னிஹோத்ரி இயக்கிய இப்படம் சர்ச்சையை மட்டுமல்லாமல் இந்தியா முழுவதும் மக்களிடம் பெரிய ஆதரவைப் பெற்றது. இதன் விளைவாக ரூ.340 கோடி வரை வசூலித்தது. அனுபம் கெர், தர்ஷன் குமார், மிதுன் சக்கரவர்த்தி, பல்லவி ஜோஷி உள்ளிட்டோர் இப்படத்தில் முக்கிய கதாபாத்திரங்களில் நடித்திருந்தனர்.
இந்நிலையில், தி காஷ்மீர் ஃபைல்ஸ் திரைப்படம் வெளியான 3 ஆண்டு நிறைவினை முன்னிட்டு, தி தில்லி ஃபைல்ஸ் குறித்து புதிய அப்டேட் வழங்கப்பட்டுள்ளது.
“தி காஷ்மீர் ஃபைல்ஸ்” படத்திற்கு கிடைத்த மிகப்பெரிய ஆதரவிற்கு நன்றி. தற்போது, ஒரு புதிய உண்மையை மக்களுக்கு முன்வைக்க தயாராக உள்ளோம் என படக்குழு தெரிவித்துள்ளது. தி தில்லி ஃபைல்ஸ் திரைப்படம் ஆகஸ்ட் 25ஆம் தேதி திரையரங்குகளில் வெளியிடப்பட உள்ளது. இந்தப் படத்தையும் விவேக் ரஞ்சன் அக்னிஹோத்ரி இயக்கியுள்ளார் என்பதும் குறிப்பிடத்தக்கது.
