தமிழில் இயக்குனர் எச். வினோத் இயக்கத்தில், நடிகர் விஜய் தனது 69வது திரைப்படமாகவும் கடைசி படமாகவும் அறிவித்த படத்தில் நடித்து வருகிறார். இந்த படத்தில் பாபி தியோல், பூஜா ஹெக்டே, மமிதா பைஜூ, கவுதம் வாசுதேவ் மேனன், பிரகாஷ் ராஜ், வரலட்சுமி, டிஜே அருணாசலம் உள்ளிட்ட பலர் முக்கிய கதாபாத்திரங்களில் நடிக்கின்றனர். இந்த திரைப்படத்தை கே.வி.என் புரொடக்சன்ஸ் நிறுவனம் தயாரிக்க, அனிருத் இசையமைப்பாளராக பணியாற்றுகிறார்.
இந்த படத்தின் படப்பிடிப்பு சென்னை பகுதியில் அமைக்கப்பட்ட பிரம்மாண்ட செட்களில் பல கட்டமாக விரைவாக நடைபெற்று வருகிறது. குடியரசு தினத்தை முன்னிட்டு இன்று (ஜனவரி 26) காலை, படக்குழுவால் இப்படத்தின் முதல் பார்வை போஸ்டர் வெளியிடப்பட்டுள்ளது.
‛ஜனநாயகன்’ என பெயரிடப்பட்டுள்ள இந்த படத்தின் போஸ்டரில், தொண்டர்கள் கூட்டத்தின்முன் நடிகர் விஜய் வேனில் நின்று ‛செல்பி’ எடுக்கும் காட்சியாக அமைந்துள்ளது. விஜய் அரசியல் கட்சியை துவங்கியுள்ளார் என்பதுடன், இது அவரது கடைசி படமாகவும், அரசியல் பின்னணியை கொண்ட கதையாகவும் உருவாகும் என்று கூறப்படுகிறது. வெளியிடப்பட்ட பர்ஸ்ட் லுக் போஸ்டரும் அதை பிரதிபலிக்கும் விதமாக அமைந்துள்ளது.
