இயக்குனர் சிறுத்தை சிவா இயக்கத்தில் சூர்யா, திஷா பதானி, பாபி தியோல் ஆகியோர் நடித்துள்ள ‘கங்குவா’ திரைப்படம் நவம்பர் 14ஆம் தேதி தமிழ், தெலுங்கு, ஹிந்தி உள்ளிட்ட 10 மொழிகளில் வெளியாக உள்ளது. இந்தப் படத்திற்காக அதிகாலை காட்சிக்கான அனுமதி கோர்ந்து தயாரிப்பு நிறுவனம் தமிழக அரசிடம் விண்ணப்பித்திருந்தது. “கேரளா, கர்நாடகா, ஆந்திரா, தெலுங்கானா போன்ற மாநிலங்களில் நவம்பர் 14ஆம் தேதி அதிகாலை 4 மணி முதல் காட்சிகள் தொடங்குகின்றன. தமிழகத்திலும் அதிகாலை காட்சிக்கான அனுமதி கோரியுள்ளோம். அனுமதி கிடைத்தவுடன் அதுபற்றி தகவல் வழங்குகிறோம்,” என்று தயாரிப்பு நிறுவனம் சமீபத்தில் அறிவித்தது.
இதன் பின்னர், நவம்பர் 14ஆம் தேதி மட்டும் தமிழக அரசு சிறப்பு காட்சிக்கான அனுமதி வழங்கியுள்ளது. அன்றைய தினத்தில் மட்டும் கூடுதலாக ஒரு காட்சியை சேர்த்து மொத்தம் 5 காட்சிகளை திரையிட அனுமதி வழங்கப்பட்டுள்ளது.
ஆனால், காலை 9 மணி முதல் நள்ளிரவு 2 மணிக்குள் இந்த 5 காட்சிகளையும் திரையிட்டு முடிக்க வேண்டும் என்று அரசு தெரிவித்துள்ளது. அதிகாலை 4 மணி காட்சிக்கு அனுமதி வழங்கப்படவில்லை என்பது குறிப்பிடத்தக்கது.
