நடிகர் சூர்யாவின் 44-வது திரைப்படமான ‘ரெட்ரோ’ படத்தை இயக்குநர் கார்த்திக் சுப்பராஜ் இயக்கியுள்ளார். சூர்யாவின் 2D எண்டர்டெயின்மென்ட் மற்றும் கார்த்திக் சுப்பராஜின் ஸ்டோன் பென்ச் நிறுவனம் இணைந்து தயாரித்துள்ள இந்த படத்திற்கு இசையமைப்பாளர் சந்தோஷ் நாராயணன் இசையமைத்துள்ளார்.
பூஜா ஹெக்டே கதாநாயகியாக நடித்திருக்கும் இந்த படத்தில், ஜெயராம், கருணாகரன், ஜோஜு ஜார்ஜ், சுஜித் ஷங்கர் ஆகியோர் முக்கிய கதாபாத்திரங்களில் நடித்துள்ளனர். வரும் மே 1-ந் தேதி, தொழிலாளர் தினத்தை முன்னிட்டு படம் திரையரங்குகளில் வெளியிடப்பட உள்ளது. இதற்கு முன்பு, படத்தின் டீசரும், முதல் பாடலும் வெளியான நிலையில், இரண்டும் ரசிகர்கள் மத்தியில் நல்ல வரவேற்பைப் பெற்றன.
இதனை தொடர்ந்து, படத்தின் முக்கியமான படப்பிடிப்பு காட்சிகள் காமிக்ஸ் வடிவில் வெளியிடப்பட்டு வருகின்றன. ரிலீஸ் தேதி நெருங்கி வருவதால், படத்தின் பின்னணி வேலைகள் தற்போது தீவிரமாக நடைபெற்று வருகிறது. இந்த நிலையில், நடிகர் சூர்யா ‘ரெட்ரோ’ படத்திற்கான டப்பிங் பணியை முழுமையாக நிறைவு செய்துள்ளார்.