நடிகர் ஷாம் கடைசியாக 2019ஆம் ஆண்டில் காவியன் படத்தில் நாயகனாக நடித்தார். அதன்பின், அவர் குணசித்ரம் மற்றும் வில்லன் கதாபாத்திரங்களில் நடித்தார். தற்போது, அஸ்திரம் எனும் புதிய திரைப்படத்தில் மீண்டும் நாயகனாக நடிக்கிறார்.
இந்த படத்தை பெஸ்ட் மூவிஸ் நிறுவனத்தின் சார்பில் தன சண்முகமணி தயாரிக்கிறார். கிரைம் இன்வெஸ்டிகேஷன் திரில்லர் வகையில் உருவாகியுள்ள இப்படத்தில், ஷாம் நாயகனாக நடிக்க, மாடலிங் துறையை சேர்ந்த நிரஞ்சனி நாயகியாக அறிமுகமாகிறார். இப்படத்தை அறிமுக இயக்குநர் அரவிந்த் ராஜகோபால் இயக்குகிறார்.
மேலும், முக்கிய வேடங்களில் நிழல்கள் ரவி, ஜீவா ரவி, அருள் டி.சங்கர் மற்றும் புதிய நடிகர் ரஞ்சித் உள்ளிட்ட பலர் நடிக்கிறார்கள். இசையமைப்பாளராக ஐரா, எட்டு தோட்டாக்கள், பொம்மை நாயகி ஆகிய படங்களில் பணியாற்றிய சுந்தரமூர்த்தி பணியாற்றுகிறார். ஒளிப்பதிவாளராக ரேஞ்சர், ஜாக்சன் துரை போன்ற படங்களில் பணியாற்றிய கல்யாண், இத்திரைப்படத்திற்கும் ஒளிப்பதிவு செய்கிறார். அஸ்திரம் திரைப்படம் பிப்ரவரி 21ஆம் தேதி வெளியாக உள்ளது.
