நானி நடிப்பில், இயக்குநர் ஸ்ரீகாந்த் ஒடேலா இயக்கத்தில் 2023ஆம் ஆண்டு வெளியான படம் தசரா. அந்தப் படத்தின் வெற்றியைத் தொடர்ந்து, மீண்டும் நானி மற்றும் ஸ்ரீகாந்த் ஒடேலா இணைந்து, நானியின் 33வது படமாக தி பாரடைஸ் என்ற திரைப்படத்தை உருவாக்கியுள்ளனர். தசரா படத்தில் போலவே, இத்திரைப்படத்திலும் நானி வித்தியாசமான கதாப்பாத்திரத்தில் நடித்து இருக்கிறார்.
அனிருத் இசையமைக்கும் இந்த படம் தமிழ், தெலுங்கு, மலையாளம், கன்னடம், ஹிந்தி, பெங்காலி, ஸ்பானிஷ், ஆங்கிலம் உள்ளிட்ட எட்டு மொழிகளில் ஒரே நேரத்தில் 2026 மார்ச் 26ம் தேதி வெளியாக உள்ளது. சமீபத்தில் இப்படத்தின் பர்ஸ்ட் லுக் போஸ்டர் வெளியாகி வைரலானது.
அதனைத் தொடர்ந்து, படக்குழு ஒரு முக்கிய அறிவிப்பை வெளியிட்டுள்ளது. அதாவது, தெலுங்கு திரையுலகின் முன்னணி நடிகரான மோகன் பாபு இப்படத்தில் இணைந்துள்ளார். அவர் தி பாரடைஸ் திரைப்படத்தில் வில்லன் கதாபாத்திரத்தில் நடிக்கிறார் என படக்குழு அதிகாரப்பூர்வமாக அறிவிக்கப்பட்டுள்ளது.
