இயக்குனர் லோகேஷ் கனகராஜ் மற்றும் நடிகர் ரஜினிகாந்த் கூட்டணியில் உருவாகியுள்ள திரைப்படம் ‘கூலி’. இந்தப் படத்திற்கு அனிருத் இசையமைத்துள்ளார். இப்படத்தில் அமீர் கான், சத்யராஜ், நாகர்ஜுனா, சௌபின் ஷாஹிர், சுருதிஹாசன், பகத் பாசில், ரெபா மோனிகா ஜான் மற்றும் உபேந்திரா ஆகியோர் முக்கிய கதாப்பாத்திரங்களில் நடித்துள்ளனர். ரசிகர்கள் மத்தியில் இப்படத்தின் மீது மிகுந்த எதிர்பார்ப்பு நிலவி வருகிறது. இந்த படம் ஆகஸ்ட் 14ம் தேதி வெளியாக இருக்கிறது. இந்தப் படத்தில் இடம்பெற்ற ‘சிக்கிடு’, ‘மோனிகா’ மற்றும் ‘பவர் ஹவுஸ்’ ஆகிய பாடல்கள் வெளியாகி ரசிகர்களிடையே பெரும் வரவேற்பை பெற்றுள்ளன.
லோகேஷ் கனகராஜின் நெருங்கிய நண்பர் மடோன் அஸ்வின். சமீபத்தில் ‘கூலி’ படத்திற்காக அளித்த ஒரு பேட்டியில் லோகேஷ் கனகராஜ், மடோன் அஸ்வின்-ஐ பாராட்டியுள்ளார். அதில், “நாங்கள் குறும்படம் எப்படியிருக்கும் என கற்றுக் கொண்டிருந்தபோது, மடோன் அஸ்வின் தேசிய விருது வாங்கிய குறும்படத்தை எடுத்திருந்தான். அந்த விருதை அவனது அறையில்தான் முதன்முறையாக பார்த்தேன். முதல் படமே தேசிய விருது கிடைக்கும் படமாக இருக்கவேண்டும் என விரும்பினான். பத்தாண்டுகள் கழித்து ‘மண்டேலா’ இயக்கினான்.
2014-ம் ஆண்டு நான் எனது முதல் படத்தை கையெழுத்திட்டபோது, அவன் இன்னும் கதை எழுதிக் கொண்டிருந்தான். நான் எனது நான்காவது படத்தை இயக்கும் நேரத்தில் தான் அவன் முதல் படத்தை வெளியிட்டான். அஸ்வின் முழுவதும் தயாராகியபின் தான் படத்தை இயக்குவான். நானோ கடைசி பெஞ்சில் உட்கார்ந்த மாணவன் போல, ஏதாவது செய்து தப்பித்துவிடுவேன். ‘மாவீரன்’ கூட இவ்வளவு கமர்ஷியலாக வந்துவிட்டதே என்றே அவன் எண்ணுவான். அதனால்தான் அடுத்தப்படம் எழுத பல நாட்கள் எடுத்துக்கொண்டு இருக்கிறான் என்றுள்ளார்.
