தென்னிந்திய சினிமாவின் முன்னணி நடிகரான சூர்யா, தனது திறமையான நடிப்பால் ரசிகர்களை ஈர்த்துக் கொண்டிருக்கிறார். இவரது நடிப்பில், சிறுத்தை சிவா இயக்கத்தில் கடந்த நவம்பர் 14-ஆம் தேதி ‘கங்குவா’ திரைப்படம் வெளியானது. இந்த படத்தில் பாபி தியோல், திஷா பதானி, யோகி பாபு ஆகியோர் முக்கிய கதாபாத்திரங்களில் நடித்துள்ளனர். படம் கலவையான விமர்சனங்களை பெற்றது. இதனைத் தொடர்ந்து, கார்த்திக் சுப்புராஜ் இயக்கத்தில் சூர்யாவின் 44-வது திரைப்படம் முழுமையாக நிறைவு பெற்றுள்ளது.
அடுத்ததாக, சூர்யாவின் 45-வது திரைப்படத்தை ஆர்.ஜே. பாலாஜி இயக்கவுள்ளதாகவும், அதற்கு ஏ.ஆர். ரகுமான் இசையமைப்பதாகவும் அதிகாரபூர்வமாக அறிவிக்கப்பட்டுள்ளது. இந்த திரைப்படத்தை ட்ரீம் வாரியர் பிக்சர்ஸ் நிறுவனம் தயாரிக்க உள்ளது. படத்தின் அறிவிப்பு போஸ்டரை பார்த்தால், இது கிராமப்புறத்தை மையமாகக் கொண்டு உருவாகும் திரைப்படமாக இருக்கும் என்று எதிர்பார்க்கப்படுகிறது. தற்போது, இப்படத்திற்கு ‘சூர்யா 45’ என்று தற்காலிகமாக தலைப்பு வைக்கப்பட்டுள்ளது.
தகவலின்படி, இப்படத்தின் கதை முதலில் நடிகை திரிஷாவுக்காக ‘மாசாணி அம்மன்’ என்ற தலைப்பில் ஆர்.ஜே. பாலாஜி எழுதியதாக கூறப்படுகிறது. ஆனால் பின்னர், கதை சூர்யாவுக்கு ஏற்றவாறு மேம்படுத்தி மாற்றப்பட்டது. சமீபத்திய நிகழ்ச்சியொன்றில், ‘சூர்யா 45’ படத்தில் திரிஷா கதாநாயகியாக நடிக்கவுள்ளார் என்றும் இதற்காக பேச்சுவார்த்தைகள் நடந்து வருவதாக தகவல்கள் வெளியாகியுள்ளன. இதற்கு முன், சூர்யா மற்றும் திரிஷா ‘மவுனம் பேசியதே’, ‘ஆறு’ போன்ற திரைப்படங்களில் இணைந்து நடித்துள்ளனர் என்பது குறிப்பிடத்தக்கது.
