பிரபல இயக்குநர் ஏ.ஆர்.முருகதாஸ் இயக்கும் புதிய படத்தில் பாலிவுட் நடிகர் சல்மான் கான் கதாநாயகனாக நடிக்கிறார். இப்படத்தில் சல்மான் கானுக்கு ஜோடியாக ராஷ்மிகா மந்தனா நடித்துக் கொண்டிருக்கிறார். இப்படத்துக்கு ‘சிக்கந்தர்’ என்று பெயர் வைக்கப்பட்டுள்ளது. இது புராணக் கதையை அடிப்படையாகக் கொண்ட படம். இப்படத்தை பிரபல தயாரிப்பாளர் சஜித் நதியத்வாலா தயாரித்து வருகிறார்.
இதில் குறிப்பிடத்தக்கது என்னவென்றால், சல்மான் கான் 10 ஆண்டுகளுக்குப் பிறகு தயாரிப்பாளர் சஜித் நதியத்வாலாவுடன் மீண்டும் இணைந்து செயல்படுகிறார். மேலும் இப்படத்தில் காஜல் அகர்வால், சுனில் ஷெட்டி மற்றும் சத்யராஜ் ஆகியோர் முக்கிய கதாபாத்திரங்களில் நடிக்கின்றனர். ஆக்ஷன் கதைக்களத்தில் உருவாகி வரும் இப்படத்தின் படப்பிடிப்பு சமீபத்தில் மும்பை ரெயில் நிலையத்தில் நடைபெற்றது.
சல்மான் கான் தனது எக்ஸ் பக்கத்தில், இப்படம் அடுத்த ஆண்டு ரம்ஜான் பண்டிகைக்கு வெளியாகும் என முன்பே அறிவித்திருந்தார். இந்நிலையில், இப்படத்திற்குப் பின்னணி இசையை சந்தோஷ் நாராயணன் அமைக்க உள்ளதாக தகவல் வெளியாகியுள்ளது. விரைவில் இதுகுறித்த அதிகாரப்பூர்வ தகவல் வெளியாகும் என்று எதிர்பார்க்கப்படுகிறது.
