அதர்வா நடித்த ‘ஈட்டி’, ஜிவி பிரகாஷ் நடித்த ‘ஐங்கரன்’ ஆகிய படங்களை இயக்கியவர் ரவி அரசு. அதன் பின்னர், சிவராஜ் குமாரை வைத்து ‘ஜாவா’ என்ற படத்தை இயக்க திட்டமிட்டிருந்தார். ஆனால், சிவராஜ் குமாரின் உடல்நிலை சரியில்லாமல் போனதால், அந்த படம் தற்காலிகமாக கைவிடப்பட்டது. இதனால், அவர் தனது அடுத்த படத்திற்கான பணிகளை தொடங்கினார். அந்த வகையில், நடிகர் விஷாலிடம் ஒரு கதையை கூறி, அவரிடமிருந்து ஒப்புதல் பெற்றிருந்தார்.
இந்நிலையில், இந்த படம் இவர்கள் கூட்டணியில் உருவாக உள்ளது. இதை விஷாலே தனது ‘விஷால் பிலிம் பேக்டரி’ நிறுவனம் மூலம் தயாரிக்க உள்ளார். தற்போது, இந்த படத்தில் கதாநாயகியாக துஷாரா விஜயன் ஒப்பந்தம் செய்யப்பட்டுள்ளதாக கூறப்படுகிறது.
‘சார்பட்டா பரம்பரை’, ‘ராயன்’, ‘வேட்டையன்’ உள்ளிட்ட படங்களில் நடித்தவர் துஷாரா விஜயன். கடந்த வாரம் விக்ரம் உடன் நடித்த ‘வீர தீர சூரன்’ படம் வெளியானது, மேலும் அதற்கு நல்ல வரவேற்பு கிடைத்துள்ளது. இப்போது, அவர் விஷாலுடன் இணைந்து நடிக்க உள்ளார். விரைவில் இதற்கான அதிகாரப்பூர்வ அறிவிப்பு வெளியாகும் என்று தகவல் கிடைத்துள்ளது.
