நடிகர் சூரி நடித்த ‘மாமன்’ திரைப்படம் கடந்த 16ம் தேதி வெளியானது. இந்த படத்தை பிரசாந்த் பண்டிராஜ் இயக்கியுள்ளார். லார்க் ஸ்டுடியோஸ் நிறுவனம் தயாரித்துள்ள இப்படத்தில், சூரிக்கு ஜோடியாக ஐஸ்வர்யா லட்சுமி நடித்துள்ளார். மேலும் சுவாசிகா, ராஜ்கிரண், பால சரவணன், பாபா பாஸ்கர் உள்ளிட்ட பலரும் முக்கிய வேடங்களில் நடித்துள்ளனர். குடும்ப உறவுகளை மையமாகக் கொண்டு உருவாகியுள்ள இந்த படம், ரசிகர்களிடையே நல்ல வரவேற்பைப் பெற்றுள்ளது.
இந்நிலையில், நடிகர் சூரி தனது சமூக வலைதள பக்கத்தில், நடிகர் ராஜ்கிரணுடன் நடித்த அனுபவத்தை மனம் நெகிழச் சொல்லியுள்ளார். அதில், “ராஜ்கிரண் சார் அவர்களின் நடிப்பு எனது வாழ்க்கைப் பயணத்தில் மறக்க முடியாத ஒரு பெரும் கற்றல் அனுபவமாகும். ‘மாமன்’ படத்திற்கு அவரைப் போல் ஒரு வரம் வேறு யாரும் இருக்க முடியாது. ‘சிங்கம்’ என்ற கதாபாத்திரத்தை அவர் நடித்ததேயில்லை — அதை முழுமையாக உணர்ந்து, ஒவ்வொரு மூச்சிலும் அந்த வேடத்தை வாழ்ந்தார். அவரது ஆழமான உணர்ச்சிகள், குறிப்பாக விஜி மேடம் அவர்களுடன் பகிர்ந்த அழகான கேமிஸ்ட்ரி, இந்தக் கதையின் நட்பும் நேசமும் முழுமையாக பரவச் செய்தது.
இந்திய சினிமாவின் வரலாற்றில் தனிச்சான்றாக திகழும் ராஜ்கிரண் சார் அவர்களுடன் ஒரு காட்சி மட்டுமல்லாமல், முழு படத்தையே பகிர்ந்து நடிக்க வாய்ப்பு கிடைத்தது எனக்கு வாழ்வில் கிடைத்த மிகப் பெரிய ஆசீர்வாதமாகும். எளிமை மற்றும் தன்னம்பிக்கையால் நிறைந்த அந்த மனிதரிடமிருந்து நேரில் கற்றுக்கொள்ளும் வாய்ப்பு எனக்கு கிடைத்தது என்பது, என் வாழ்வில் எப்போதும் ஒளிரும் நினைவாக இருக்கும். இதற்காக எனது மனமார்ந்த நன்றி. இந்த பயணத்திற்கு நான் என்றும் கடமைப்பட்டவனாக இருப்பேன்” என சூரி தெரிவித்துள்ளார்.
