பாடகர் மனோ கடந்த மாதம் திருநள்ளாறு கோயிலில் சனீஸ்வர பகவானை வழிபட்டார். அந்த புகைப்படம் சமூக வலைதளங்களில் வைரலானது. இதையடுத்து, சென்னையில் நடைபெற்ற நிகழ்வில் பத்திரிகையாளர்கள் “நீங்கள் மதம் மாறிவிட்டீர்களா?” என்று கேள்வி எழுப்பினர். அதற்கு மனோ, “எம்மதமும் எனக்கு சம்மதம். நான் எந்த ஒரு மதத்தையும் எதிர்ப்பதில்லை,” என பதிலளித்தார்.
மனோவின் மகன் துருவன், பித்தாக் புகழேந்தி இயக்கிய ‘வட்டக்கானல்’ திரைப்படத்தில் ஹீரோவாக நடித்துள்ளார். படம் நாளை வெளியாக உள்ளது. சென்னையில் நடைபெற்ற பிரசாரம் நிகழ்ச்சியில் மனோ கூறியதாவது: “என் மகன் இந்த படத்தில் ஹீரோவாக நடித்துள்ளார். தற்போது அவர் டைபாய்டு காய்ச்சலால் பாதிக்கப்பட்டிருப்பதால் நிகழ்ச்சியில் கலந்துகொள்ள முடியவில்லை. அதனால், அவருக்குப் பதிலாக நான் வந்துள்ளேன். இந்தப் படத்தில் நானும் ஹீரோயின் தந்தையாக சில காட்சிகளில் நடித்துள்ளேன்,” என்றார்.
மேலும் அவர் கூறுகையில், “என் பாடலை இந்து, முஸ்லிம், கிறிஸ்தவர் என எல்லா தரப்பினரும் கேட்கிறார்கள். எனவே, நான் மும்மதத்துக்கும் சொந்தமானவன். எம்மதமும் சம்மதம் என்பதே என் கொள்கை. பாடகர்களுக்கு மதம் இல்லை, நான் மதம் மாறவில்லை,” என்று தெரிவித்தார். ‘வட்டக்கானல்’ படம் கொடைக்கானல் வட்டக்கானல் பகுதியில் விளையும் காளானின் பாதிப்பு மற்றும் அதனால் ஏற்படும் சண்டைச் சச்சரவுகளை மையமாகக் கொண்டது. இந்தப் படத்தில் பாடகர் மனோ மகன் துருவனின் தந்தையாக நடிகர் ஆர்.கே. சுரேஷ் நடித்துள்ளார்.
