ஒரு கொலைக்குச் காரணமானவர்களை கண்டுபிடிக்க முயல்கிற ஒரு இன்ஸ்பெக்டரை மையமாகக் கொண்ட கதை. இதுபோன்ற பல கதைகளுடன் பல படங்கள் வந்திருந்தாலும், இந்தப் படத்தில் யார் குற்றவாளி என்பதை கிளைமாக்ஸ் வரை யூகிக்க முடியாத வகையில் சஸ்பென்ஸை காப்பாற்றியுள்ளார் இயக்குநர்.
சிறப்பு அதிகாரியை அடித்ததன் காரணமாக சஸ்பெண்ட் செய்யப்பட்டவர் இன்ஸ்பெக்டர் சுந்தர் சி. ஒரு பிரபலமான கிறிஸ்துவ மத போதகரின் மருமகன் கொடூரமாகக் கொல்லப்படுகிறார். இந்தக் கொலைக்குக் காரணமானவர்களை கண்டுபிடிக்க சுந்தர் சியிடம் உதவி கமிஷனர் கோருகிறார். சுந்தர் சிக்கும் இந்த வழக்கில் ஆர்வம் அதிகமாக இருந்தது, ஏனெனில் அவரது வருங்கால மனைவி காணாமல் போன வழக்குடன் இதற்குப் தொடர்பு இருக்கலாம் என்று அவர் நினைக்கிறார். கொலைக்குப் பின்னால் யார் இருக்கிறார்கள் என்பதை அவர் கண்டுபிடிக்கிறாரா இல்லையா என்பதே படத்தின் மீதிக் கதை.
வருங்கால மனைவி காணாமல் போனதால் சுந்தர் சி எப்போதும் சோகத்துடன் இருக்கிறார். ஆக்ஷன் காட்சிகளில் அவர் அதிரடி மிகுந்து, நம்பக்கூடிய வகையில் இருக்கிறார். எத்தனை பேரை அடித்தாலும் அது யதார்த்தமாக தோன்றுகிறது. இயக்குநராக பலருக்கு வாய்ப்பு கொடுத்தவர், தனி நடிகராகவும் முயற்சி செய்துள்ளார். ஆனால் தனது நடிப்பில் உணர்வுகள் குறைவாகவே தோன்றுகிறது. அவரது பேச்சும் நடிப்பும் கடமைக்காக செய்கிற மாதிரியே உள்ளது; ஒரு அழுத்தம், உணர்வுபூர்வம் என எந்த அம்சங்களும் மிகுதியாக இல்லாமல் இருக்கிறது.
சுந்தர் சியின் காதலியாக தன்யா ஹோப், பிளாஷ்பேக்கில் சில காட்சிகளில் மட்டும் தோன்றுகிறார். படத்தின் முழு நீள நாயகியாக ஹீபா பட்டேல் நடித்துள்ளார். அவர் சினிமாவில் நாயகியாக நடிக்க ஆசைபடும் பெண்ணாகவும், கொலை வழக்கில் சந்தேகத்தில் சிக்கி, சுந்தர் சிக்கு உதவியாகவும் நடிக்கிறார். மற்ற கதாபாத்திரங்களில், கொல்லப்படும் தொழிலதிபராக கமல் காமராஜ், அவரது மனைவியாக அபிராமி வெங்கடாசலம், அவரது மாமனாராக ஜெயக்குமார் நடித்துள்ளனர்.
கிரைம் திரில்லர் வகைக்கு ஏற்ற வேகத்துடன் மணிபெருமாள் கேமரா வேலை சிறப்பாக உள்ளது. திரில்லர் படங்களுக்கு பின்னணி இசை மிக முக்கியம், அதை சரியாகச் செய்திருக்கிறார் இசையமைப்பாளர் சந்தோஷ் தயாநிதி. பரபரப்பை தாங்கும் பின்னணி இசை பாராட்டுக்குரியது. தேவையற்ற காட்சிகள் நீட்டாமல், பிளாஷ்பேக் பகுதிகளை சுருக்கமாகவே முடித்திருக்கிறார்கள். இது வழக்கமான திரில்லர் படமாகவே இருக்கும், ஆனால் வேறு எந்த வித்தியாசமான அம்சங்களும் இல்லை. இருப்பினும் படம் போரடிக்காமல் தொடர்ந்து நகர்கிறது.
