‘திருக்குறள்’ திரைப்படம் – வள்ளுவ நாட்டில் தனது மனைவி தனலட்சுமி மற்றும் குழந்தையுடன் மகிழ்ச்சியாக வாழ்ந்துகொண்டு இருக்கிறார் கலைச்சோழன். ஒரு கட்டத்தில், உலகத்துக்கெல்லாம் பொதுவானதாகக் கருதப்படும் திருக்குறளை எழுத தொடங்குகிறார் அவர்.
அதே நேரத்தில், இரு நாடுகளுக்கிடையே யுத்த சூழ்நிலை உருவாக, அறத்தின் பாதையை கடைப்பிடித்தவாறே மக்களை காப்பாற்ற போராடுகிறார் கலைச்சோழன். இதே சூழலில் படைத்தலைவனான குணாபாபுவுக்கும், பாதினிகுமாருக்கும் இடையே காதல் மலர்கிறது. போரின் உச்சகட்டத்தில், திருக்குறளை கலைச்சோழன் எழுத முடித்தாரா? அந்த போருக்கு முடிவு என்னவாகியது? குணாபாபு – பாதினிகுமாரின் காதல் என்ன முடிவுக்கு வந்தது? என்ற கேள்விகளுக்கான பதில்கள் இந்த கதையின் மீதியை அமைக்கின்றன.
நடையும், உடையும், பேச்சு என திருவள்ளுவராகவே வாழ்ந்துள்ளார் கலைச்சோழன். அவரது உடல் மொழியும், இசை போல் ஒலிக்கும் தமிழ் உச்சரிப்பும் பாராட்டதக்கவை. தனலட்சுமியாக நடித்தவர், சளைக்காத நடிப்பால் கண்கவர் மின்னலாகத் தெரிகிறார். கண்கள் வழியே காதலை மொழிபெயர்த்துத் தரும் அவர் காட்சிகள் அழகாக அமைகின்றன.
குணாபாபு மற்றும் பாதினிகுமாரின் காதல் காட்சிகள் நன்கு ஈர்க்கின்றன. சுப்பிரமணிய சிவா, ஓ.ஏ.கே.சுந்தர், சுகன்யா, சந்துரு, கொட்டாச்சி, கார்த்தி, ஹரிதாஸ்ரீ உள்ளிட்டோர் நடித்துள்ள விதமும் கவனத்தை ஈர்க்கிறது. கடந்த காலத்தை கண்முன் கொண்டு வருவதில் ஒளிப்பதிவாளர் எட்வின் சகாய் சிறப்பாக செயல்பட்டுள்ளார். இளையராஜாவின் இசை படத்துக்கு உயிரூட்டியிருக்கிறது.
“முல்லைவாசம்…”, “கொத்து கொத்தாய்…” போன்ற பாடல்கள் இசை ரசனைக்காக மீண்டும் மீண்டும் கேட்கும் அளவுக்கு உள்ளன. கதாபாத்திரங்களின் நடிப்பு, சலிப்பு இல்லாத தமிழ் வசனங்கள் படத்தின் பலமாக அமைகின்றன. மெதுவாக நகரும் திரைக்கதை ஒரு சிறிய குறையாகும். ஆனாலும், திருவள்ளுவரின் காலத்தை நன்கு படமாக்கி, அதில் காதல், மோதல் உள்ளிட்ட பல கூறுகளைச் சேர்த்து ரசிக்க வைக்க முடிந்திருக்கிறார் இயக்குநர் ஏ.ஜெ. பாலகிருஷ்ணன்.
