தமிழ் சினிமாவின் முன்னணி நடிகரான விஜய், தற்போது எச். வினோத் இயக்கத்தில் உருவான ‘ஜனநாயகன்’ படத்தில் நடித்துத் தீர்த்துள்ளார். தீவிர அரசியலுக்குள் குதித்துள்ள விஜய் நடிக்கும் கடைசி திரைப்படம் இதுவே என கூறப்படுகிறது. இதனால் இந்தப் படத்திற்கு சினிமா தாண்டியும் அரசியல் வட்டாரங்களிலும் பெரும் எதிர்பார்ப்பு உருவாகியுள்ளது.
இப்படம் வழக்கமான விஜய் படங்களைப்போல் இல்லாமல், அரசியல் நிறைய கொண்டதாக இருக்கும் என்று தெரிய வந்துள்ளது. அதேசமயம், பஞ்ச் வசனங்களுக்கும் குறைவில்லையாம். மேலும், விஜய்யின் கட்சி மற்றும் கட்சிக்கொடி பற்றிய சில காட்சிகளும் இதில் இடம்பெற்றுள்ளதாக கூறப்படுகிறது.
அதேபோல் எம்.ஜி.ஆர். புகைப்படங்களும், அவரைச் சார்ந்த சில காட்சிகளும் இடம்பெறும் வாய்ப்பு உள்ளது என எதிர்பார்க்கப்படுகிறது. குறிப்பாக, அவரது சில பாடல் வரிகளும் பயன்படுத்தப்படவுள்ளதாக தகவல்கள் வெளியாகியுள்ளன. சமீபத்தில் அரசியல் மேடைகளில் எம்.ஜி.ஆர். பற்றி தொடர்ந்து குறிப்பிட்டு வந்த விஜய், தனது படத்திலும் அவரைச் சார்ந்த காட்சிகளை சேர்த்திருப்பது ரசிகர்கள் மற்றும் அரசியல் வட்டாரங்களில் பெரும் எதிர்பார்ப்பை ஏற்படுத்தியுள்ளது.
