நடிகர் தனுஷ் ராயன் படத்தை தொடர்ந்து ‘நிலவுக்கு என் மேல் என்னடி கோபம்’ என்ற படத்தை இயக்கியுள்ளார். இதனைத்தொடர்ந்து, தனுஷ் ‘இட்லி கடை’ என்ற புதிய திரைப்படத்தை இயக்கி நடித்து வருகிறார்.
தனுஷ் இயக்கியுள்ள’நிலவுக்கு என் மேல் என்னடி கோபம்’ படத்தின் மூலம் தனுஷின் சகோதரியின் மகன் பவிஷ் கதாநாயகனாக அறிமுகமாகிறார். இந்த திரைப்படத்தில் அனிகா சுரேந்திரன், பிரியா பிரகாஷ் வாரியர், மேத்யூ தாமஸ், வெங்கடேஷ் மேனன் உள்ளிட்ட பலர் முக்கிய கதாபாத்திரங்களில் நடித்துள்ளனர். இப்படத்திற்கு ஜி.வி.பிரகாஷ் குமார் இசையமைத்துள்ளார், மேலும் இப்படத்தை வுண்டர்பார் பிலிம்ஸ் தயாரித்துள்ளது.
இந்த படத்தின் முதல் பாடலாக ‘கோல்டன் ஸ்பாரோ’ என்ற பாடல் வெளியிடப்பட்டது. நடிகை பிரியங்கா மோகன் சிறப்பு தோற்றத்தில் நடித்துள்ள இந்த பாடல் நல்ல வரவேற்பைப் பெற்றது. இதைத் தொடர்ந்து, ‘நிலவுக்கு என் மேல் என்னடி கோபம்’ படத்தின் இரண்டாவது பாடலாக ‘காதல் பெயில்’ என்ற பாடல் தற்போது வெளியிடப்பட்டுள்ளது.
