தமிழ் மற்றும் மலையாளம் ஆகிய மொழிகளில் 100க்கும் மேற்பட்ட திரைப்படங்களில் நடித்த ரவிக்குமார் (வயது 71), உடல்நலக் குறைவால் சென்னையில் மரணமடைந்தார். இவர் பிறப்பிடம் சென்னையே என்றாலும், அவரது பூர்வீகம் கேரள மாநிலம் திருச்சூர் மாவட்டம் ஆகும். முதலில் மலையாள திரைப்படமான லக்ஷபிரபுவில் ஒரு சிறிய வேடத்தில் அறிமுகமான இவர், பின்னர் ஹீரோ மற்றும் குணச்சித்திர வேடங்களில் பல மலையாள படங்களில் நடித்தார். தொடர்ந்து, கே. பாலசந்தர் இயக்கிய ‘அவர்கள்’ படத்தின் மூலம் கமல்ஹாசன், ரஜினிகாந்த், சுஜாதா ஆகியோரைத் தோழர்களாகக் கொண்டு தமிழ்த் திரையுலகில் நுழைந்தார். அதன் பிறகு, ‘பகலில் ஓர் இரவு’ படத்தில் நடித்ததன் மூலம் மிகவும் பிரபலமானார். குறிப்பாக, அந்த படத்தில் இடம்பெற்ற ‘இளமை எனும் பூங்காற்று’ என்ற பாடல் இவரை ரசிகர்கள் மத்தியில் பேசும்படியாக்கியது.
அதன்பின், ‘மலபார் போலீஸ்’, ‘ரிஷி’, ‘ரமணா’, ‘லேசா லேசா’, ‘சிவாஜி’ போன்ற தமிழ்த் திரைப்படங்களில் முக்கிய குணச்சித்திர வேடங்களில் நடித்துள்ளார். திரைப்படங்களைத் தவிர, ராதிகா தயாரித்த ‘சித்தி’, ‘செல்வி’, ‘அரசி’, ‘செல்லமே’, ‘வாணி ராணி’ போன்ற தொடர்களிலும் நடித்துள்ள அவர், தமிழ்த் தொலைக்காட்சிப் பார்வையாளர்களிடையே பரிச்சயமான நடிகராக வலம் வந்துள்ளார்.
சினிமா துறையில் நாற்பது ஆண்டுகளுக்கும் மேலாக செயல்பட்ட ரவிக்குமார், வயதினால் உடல்நலக் குறைபாடுகளுக்கு ஆளாகி, சென்னையில் உள்ள தனியார் மருத்துவமனையில் சிகிச்சை பெற்று வந்தார். இந்நிலையில் இன்று (ஏப்ரல் 4) அவர் உயிரிழந்தார். அவருக்கு புற்றுநோய் இருந்ததாகத் தகவல்கள் கூறுகின்றன. அவரது உடல் வலசரவாக்கத்தில் உள்ள வீட்டில் பொதுமக்கள் அஞ்சலிக்காக வைக்கப்பட்டு, நாளை இறுதிச் சடங்குகள் நடைபெறுகின்றன.
