இயக்குநர் அஷ்வத் மாரிமுத்து மற்றும் பிரதீப் ரங்கநாதன் இணைந்து உருவாக்கிய திரைப்படம் ‘டிராகன்’. இப்படத்தை ஏ.ஜி.எஸ். நிறுவனம் தயாரித்துள்ளது. லியோன் ஜேம்ஸ் இந்தப் படத்துக்கு இசையமைத்துள்ளார்.
இப்படம் வெளியாகி ரசிகர்களிடம் நல்ல வரவேற்பைப் பெற்றது. திரைப்படம் உலகளவில் 100 கோடி ரூபாய் வசூலித்தது. இந்நிலையில், ‘டிராகன்’ படக்குழு நடிகர் விஜயை சந்தித்துள்ளது. அஷ்வத் மாரிமுத்து, தயாரிப்பாளர் அர்சனா, லியோன் ஜேம்ஸ், பிரதீப் ரங்கநாதன் ஆகியோர் விஜயை சந்தித்தனர். இதை இயக்குநர் அஷ்வத் மாரிமுத்து தனது எக்ஸ் தளத்தில் நெகிழ்ச்சியுடன் பதிவிட்டுள்ளார்.
அவர் பதிவில், “என் நண்பர்களுக்கு தெரியும், நான் விஜயை சந்திக்க எவ்வளவு கடினமாக உழைத்தேன் என்று. இன்று அவருக்கு எதிரில் அமர்ந்தேன். நான் எப்போதும் அதிகம் பேசுவேன். என் குழுவினர் நான் என்ன பேசப்போகிறேன் என ஆவலுடன் காத்திருந்தனர். ஆனால் என்னால் பேச முடியவில்லை. அவரைப் பார்த்ததும் என் கண்களில் ஆனந்தக் கண்ணீர் வழிந்தது. அவர் மீது எனக்குள்ள அன்பை உங்களுக்கு சொன்னால் புரியாது. அவர் என்னைப் பார்த்து ‘குட் ரைட்டிங் ப்ரோ’ என்றார். இது போதும். ஜெகதீஷ் அண்ணா மற்றும் அர்ச்சனா மேடமிற்கு என் மனமார்ந்த நன்றி” என உருக்கமாக பதிவிட்டுள்ளார்.
