தமிழ் திரைப்படங்களில் முன்னணி இயக்குநர்களில் ஒருவர் லோகேஷ் கனகராஜ் ஆவார். கார்த்தி, கமல், விஜய் போன்ற முன்னணி நடிகர்களுடன் பணியாற்றி, முக்கியமான இயக்குநராக திகழ்ந்து வருகிறார். தற்போது ரஜினிகாந்தை முன்னணி கதாபாத்திரத்தில் வைத்து ‘கூலி’ எனும் புதிய படத்தை இயக்கி வருகிறார். இந்த படத்தில் ரஜினியுடன் ஸ்ருதிஹாசன், சத்யராஜ், நாகார்ஜுனா, உபேந்திரா உள்ளிட்ட பலரும் முக்கிய கதாபாத்திரங்களில் நடித்துள்ளனர். இதைத் தவிர, நடிகர் அமீர்கான் இந்த படத்தில் சிறப்பு தோற்றத்தில் நடித்துள்ளார். இசையமைப்பை அனிருத் மேற்கொள்கிறார்.
இந்நிலையில், தனது சமூக வலைதளப் பக்கத்தில், ‘கூலி’ படத்தின் விளம்பர பணிகள் தொடங்கும் வரை, சில நாள்கள் சமூக வலைதளங்களில் இருந்து தற்காலிகமாக விடை பெறுகிறேன் என லோகேஷ் கனகராஜ் பதிவிட்டிருந்தார்.
‘கூலி’ படத்தின் படப்பிடிப்பு தற்போது முடிந்து, பிற தயாரிப்பு வேலைகள் நடைபெற்று வருகின்றன. அந்த பணிகளில் முழுமையாக ஈடுபடுவதற்காகவே அவர் இந்த இடைவெளியை எடுத்துள்ளதாக கூறப்படுகிறது. இதற்கு முன்னரே ‘லியோ’ படத்தின் நேரத்தில் கூட, லோகேஷ் கனகராஜ் சமூக வலைதளங்களில் இருந்து தற்காலிகமாக விலகியிருந்தார் என்பதும் குறிப்பிடத்தக்கது.
