திரைத் துறையில் புதியவர்களாக நடிக்க வரும் சில நடிகர், நடிகைகளுக்கு சில வேதனையான அனுபவங்கள் ஏற்படும். அப்படியொரு அனுபவத்தைப் பற்றி பாலிவுட் நடிகை ராஷ்மி தேசாய் சமீபத்தில் பகிர்ந்துள்ளார். பாலிவுட் பப்பிள் என்ற இணையதளத்துக்கு அளித்த பேட்டியில், திரைப்பட ஒத்திகைக்காக சென்றபோது நடந்த அதிர்ச்சிகரமான சம்பவத்தை குறித்து அவர் விவரித்துள்ளார்.
“பல ஆண்டுகளுக்கு முன் நடந்த விஷயம் இது. ஆனால், இன்றும் அது என் மனதிற்குள் நிறைந்து நிற்கிறது,” என அவர் தொடங்கினார். “நான் இதுபோன்ற அனுபவங்களை பலமுறை பகிர்ந்திருக்கிறேன். இதுபோன்ற சம்பவங்கள் இணையதளங்களில் ஏராளமாக இருக்கின்றன. அந்த நேரத்தில், எனக்கு ஒரு திரைப்பட ஒத்திகைக்காக வருமாறு கூறினர். நான் அங்கு சென்றபோது, அந்த நபரைத்தவிர மற்ற யாரையும் காணவில்லை. இது என்னை மிகவும் அதிர்ச்சியடையச் செய்தது,” என்று ராஷ்மி கூறினார்.
“அப்போது எனக்கு வயது 16 மட்டுமே. அந்த நபர் என்னை சுயநினைவிழந்து போகச் செய்ய முயற்சி செய்தார். இதனால் எனக்கு மிகுந்த அவமானமும் அசவுகரியமும் ஏற்பட்டது. ஆனால் எப்படியோ நான் அந்த இடத்திலிருந்து தப்பித்து வந்தேன். சில மணிநேரங்களுக்குப் பிறகு, நடந்ததை என் தாயிடம் முழுமையாக தெரிவித்தேன். என் தாய், அந்த நபருக்கு வாழ்நாளில் மறக்க முடியாத பாடத்தை கற்றுத்தர தீர்மானித்தார். அடுத்த நாள், என் தாய் மற்றும் நான் அந்த நபரை நேரில் சந்தித்தோம். என் தாய் அவரை கன்னத்தில் அறைந்துவிட்டார்,” என்று ராஷ்மி கூறியுள்ளார்.
இதற்குப் பிறகு, அவர் திரை உலகில் நல்லவர்களையும் சந்தித்து, மகிழ்ச்சியாக பணியாற்றிய அனுபவங்களைப் பகிர்ந்துள்ளார். “ஒவ்வொரு துறையிலும், பெண்களை தவறான பாதைக்கு அழைக்கும் முயற்சிகள் நடப்பதே உண்மை. ஆனால் அதே நேரத்தில், நல்லவர்களும் இருக்கிறார்கள், கெட்டவர்களும் இருக்கிறார்கள். கடவுள் எப்போதும் இரக்கம் கொண்டவர். ஒருவர் தங்கள் பாதையை எந்த தடையையும் தாண்டி உருவாக்க வேண்டும்,” என அவர் உருக்கமாக கூறியுள்ளார்.
