மாரி செல்வராஜ் இயக்கத்தில் துருவ் விக்ரம் நடித்த ‘பைசன்’ திரைப்படத்தை பா.ரஞ்சித்தின் நீலம் ஸ்டுடியோஸ் மற்றும் அப்ளாஸ் என்டர்டெயின்மெண்ட் இணைந்து தயாரித்துள்ளது. இப்படத்தில் அனுபமா பரமேஸ்வரன், லால், ரெஜிஷா விஜயன், பசுபதி, கலையரசன் உள்ளிட்ட பலர் முக்கிய வேடங்களில் நடித்துள்ளனர்.
நிவாஸ் கே.பிரசன்னா இசையமைத்த இந்த படம், அர்ஜுனா விருது வென்ற தூத்துக்குடி கபடி வீரர் மணத்தி கணேசன் வாழ்க்கையை அடிப்படையாகக் கொண்டு உருவாக்கப்பட்டுள்ளது. ‘பைசன்’ படம் கடந்த 17-ந்தேதி வெளியாகி, பிரபலங்களிடம் நல்ல வரவேற்பைப் பெற்றுள்ளது. இதையடுத்து நடிகர் ரஜினிகாந்த், இயக்குநர் மாரி செல்வராஜை தொலைபேசியில் அழைத்து பாராட்டு தெரிவித்துள்ளார்.
படக்குழு அதிகாரப்பூர்வமாக வெளியிட்ட தகவல் படி, ‘பைசன்’ படம் உலகளவில் வெளியான முதல் 3 நாட்களில் ரூ. 35 கோடி வசூலித்துள்ளது. விரைவில் தெலுங்கு மொழியில் இப்படத்தை வெளியிட திட்டமிடப்பட்டுள்ளதாகவும் அறிவிக்கப்பட்டுள்ளது.
