தமிழ் மற்றும் தெலுங்கு மொழிகளில் முன்னணி நடிகையாக இருந்த சமந்தா, சில வருடங்களுக்கு முன்பு நடிகர் நாகசைதன்யாவை காதலித்து திருமணம் செய்துகொண்டார். ஆனால், அவர்கள் இருவருக்கும் ஏற்பட்ட கருத்து வேறுபாடுகளால், விவாகரத்து செய்து பிரிந்தனர்.
இந்த நிலையில், தெலுங்கானா மாநிலத்தின் ஒரு அமைச்சர், சமந்தா மற்றும் நாகசைதன்யாவின் விவாகரத்து பின்னணியில் ஒரு பிரபல கட்சி தலைவரின் தலையீடு இருந்ததாகவும், தெலுங்கு திரையுலகில் அந்த தலைவர் வைத்திருக்கும் ஆதிக்கத்தால் பல நடிகைகள் சினிமாவை விட்டு ஓடிவிட்டதாகவும் கூறி விமர்சித்தார்.
அந்த அமைச்சரின் பேச்சுக்கு எதிராக நடிகர் நாகார்ஜுனா, நாகசைதன்யா, மற்றும் சமந்தா மூவருமே, தங்களது குடும்ப வாழ்க்கையை குறித்துக் கூறிய தவறான கருத்திற்காக அந்த அமைச்சருக்கு எதிராக கண்டனம் தெரிவித்தனர். மேலும், தெலுங்கு திரையுலகில் ராம்சரண், ஜூனியர் என்டிஆர், பிரபாஸ், ராஜமவுலி, நானி போன்ற பலரும் அந்த அமைச்சரின் கருத்தை கண்டித்து தங்களது எதிர்ப்புகளை பதிவு செய்தனர். இந்த எதிர்ப்பின் வலிமையை உணர்ந்த அந்த அமைச்சரும், தன்னை மன்னிக்குமாறு கூறி, தனது மன்னிப்பை கேட்கத் தொடங்கினார்.
இந்த சர்ச்சைகளையும், விமர்சனங்களையும் புறக்கணித்து, நவராத்திரி கொண்டாட்டத்தில் தன்னை ஈடுபடுத்திக் கொண்டுள்ளார் நடிகை சமந்தா. கோவையில் உள்ள சத்குருவின் ஈஷா யோகா மையத்தில் அமைந்துள்ள லிங்க பைரவி தேவியின் சிலை முன்பு அமர்ந்து, நவராத்திரி பூஜைகளை துவக்கியுள்ளார். இதனைப்பற்றி புகைப்படங்களை வெளியிட்டதுடன், “உங்கள் ஆசீர்வாதத்தை நான் கொண்டாடுகிறேன். நன்றி தேவி. அனைவருக்கும் நவராத்திரி வாழ்த்துக்கள்” என்று கூறியுள்ளார்.
