மலையாள திரைப்பட உலகில் கடந்த இருபது ஆண்டுகளுக்கும் மேலாக முன்னணி நகைச்சுவை நடிகராக திகழ்ந்தவர் நடிகர் சுராஜ் வெஞ்சாரமூடு. சமீபத்தில் விக்ரம் நடித்த ‘வீர தீர சூரன்’ படத்தில் வில்லனாக நடித்திருந்தார். கடந்த சில வருடங்களாக அவர் குணச்சித்திரம் மற்றும் வில்லன் வகை கதாபாத்திரங்களில் தொடர்ந்து நடித்து வருகிறார். குறிப்பாக, ‘டிரைவிங் லைசென்ஸ்’, ‘ஆண்ட்ராய்டு குஞ்சப்பன்’, ‘விக்ருதி’, ‘தி கிரேட் இந்தியன் கிச்சன்’ உள்ளிட்ட திரைப்படங்களில் அவர் தனக்கே உரிய விறுவிறுப்பான நடிப்பை வெளிப்படுத்தியுள்ளார்.
இவற்றில் இவர் காட்டிய மாறாத அர்ப்பணிப்பும், நம்பகமான நடிப்பும் பாராட்டத்தக்கவை என்றாலும், மலையாள ரசிகர்கள் அவருடைய நகைச்சுவை உணர்வை மிகுந்த ஆவலுடன் எதிர்நோக்கிக்கொண்டிருந்ததை மறுக்க முடியாது. இந்த இடையே, சில வருட இடைவெளிக்குப் பிறகு, ‘படக்கலம்’ என்ற திரைப்படத்தின் மூலம் மீண்டும் நகைச்சுவை கதாபாத்திரத்துக்குத் திரும்பியுள்ளார் சுராஜ். தற்போது இந்த படம் வெளியாகியுள்ளது.
இத்திரைப்படத்தின் கதை, இரண்டு பள்ளி ஆசிரியர்கள் ஆன்லைன் ரம்மி விளையாட்டு விளையாடுவதால் ஏற்படும் பிரச்சனைகளையும், பரஸ்பர ஈகோ மோதல்களையும் மையமாகக் கொண்டது. இதில் மற்றொரு ஆசிரியராக ‘பிரேமம்’ படத்தில் புகழ்பெற்ற ஷராபுதீன் நடித்துள்ளார். இந்தப் படத்திற்கு ‘பிரேமம்’ படத்தின் இசையமைப்பாளர் ராஜேஷ் முருகேசன் இசையமைத்துள்ளார். இந்தப் படம் வெளியானதையடுத்து, சுராஜ் வெஞ்சாரமூடு எதிர்காலத்தில் மீண்டும் முறையாக நகைச்சுவை படங்களிலும் நடிப்பார் என எதிர்பார்க்கப்படுகிறது.
