கேரள அரசு ஆண்டுதோறும் சிறந்த திரைப்பட கலைஞர்களைத் தேர்ந்தெடுத்து அவர்களுக்கு விருதுகள் வழங்கி வருகிறது. அந்த வகையில், 2024ஆம் ஆண்டுக்கான கேரள மாநில திரைப்பட விருதுகள் நேற்று அறிவிக்கப்பட்டன. இந்த அறிவிப்பை திருச்சூரில் உள்ள ராமநிலயம் மண்டபத்தில் கேரள மாநில கலாச்சாரம் மற்றும் திரைப்படத்துறை அமைச்சர் சஜி செரியன் வெளியிட்டார். அப்போது ஏழு பேர் கொண்ட நடுவர் குழுவினரும் அவருடன் கலந்து கொண்டனர்.
சிறந்த நடிகருக்கான விருதை மம்முட்டி வென்றுள்ளார். அவர் நடித்த ‘பிரம்மயுகம்’ திரைப்படத்துக்காக இந்த விருது வழங்கப்பட்டுள்ளது. இதன்மூலம் கேரள மாநில அரசின் சிறந்த நடிகர் விருதை மம்முட்டி எட்டாவது முறையாக வென்றுள்ளார். ‘பெமினிச்சி பாத்திமா’ திரைப்படத்தில் சிறப்பாக நடித்த ஷம்லா ஹம்சா சிறந்த நடிகைக்கான விருதைப் பெற்றுள்ளார்.
சிறந்த திரைப்படத்துக்கான விருது, ‘மஞ்சும்மல் பாய்ஸ்’ திரைப்படத்துக்குக் கிடைத்துள்ளது. அதேசமயம், இப்படத்தை இயக்கிய சிதம்பரத்துக்கு சிறந்த இயக்குநருக்கான விருதும் வழங்கப்பட்டுள்ளது. இதே படத்தில் நடித்த சவுபின் சாஹிர் சிறந்த துணை நடிகருக்கான விருதையும் பெற்றுள்ளார். மேலும், ஷைஜு காலித் சிறந்த ஒளிப்பதிவாளர், வேடன் சிறந்த ஆண் பாடகர், ஷிபின் மெல்வின் சிறந்த ஒலிப்பதிவாளர், பசல் பக்கர் சிறந்த ஒலி கலவையாளர், அபிஷேக் நாயர் சிறந்த ஒலி வடிவமைப்பாளர், அஜயன் சாலிசேரி சிறந்த கலை இயக்குநர் ஆகிய விருதுகளையும் பெற்றுள்ளனர். இதன் மூலம் ‘மஞ்சும்மல் பாய்ஸ்’ மொத்தம் 9 பிரிவுகளில் விருதுகளை வென்று சாதனை படைத்துள்ளது.
விருது பெற்றவர்களின் முழுப் பட்டியல்:
சிறந்த குணச்சித்திர நடிகை: ‘நாடன்ன சம்பவம்’ – லிஜோமோல் ஜோஸ்
நடிப்புக்கான சிறப்பு ஜூரி விருது (ஆண்): ‘ஏஆர்எம்’ மற்றும் ‘கிஷ்கிந்தா காண்டம்’ – டோவினோ தாமஸ், ஆசிப் அலி
நடிப்புக்கான சிறப்பு ஜூரி விருது (பெண்): ‘போகேன்வில்லா’ – ஜோதிர்மயி, ‘பாரடைஸ்’ – தர்ஷனா ராஜேந்திரன்
சிறந்த இரண்டாவது படம்: ‘பெமினிச்சி பாத்திமா’
சிறந்த அறிமுக இயக்குநர்: பாசில் முகமது – ‘பெமினிச்சி பாத்திமா’
சிறந்த பிரபலமான திரைப்படம்: ‘பிரேமலு’
சிறப்பு ஜூரி பெண்கள்/திருநங்கைகள் விருது: ‘ஆல் வி இமேஜின் அஸ் லைட்’ – பாயல் கபாடியா
சிறந்த கதை: ‘பாரடைஸ்’ – பிரசன்னா விதானேஜ்
சிறந்த திரைக்கதை: ‘போகன்வில்லா’ – லாஜோ ஜோஸ், அமல் நீரட்
சிறந்த விஎப்எக்ஸ்: ‘ஏஆர்எம்’
சிறந்த நடன இயக்குநர்: ‘போகன்வில்லா’ – சுமேஷ் சுந்தர், ஜிஷ்ணுதாஸ் எம்.வி.
சிறந்த ஆடை வடிவமைப்பு: ‘ரேகசித்ரம்’, ‘போகன்வில்லா’ – சமீரா சனீஷ்
சிறந்த ஒப்பனை கலைஞர்: ‘போகன்வில்லா’, ‘பிரம்மயுகம்’ – ரோனெக்ஸ் சேவியர்
சிறந்த ஒத்திசைவு ஒலி: ‘பானி’
சிறந்த இசையமைப்பாளர்: ‘போகன்வில்லா’ – சுஷின் ஷ்யாம்
சிறந்த பின்னணி இசை: ‘பிரம்மயுகம்’ – கிறிஸ்டோ சேவியர்
சிறந்த பின்னணி பாடகி: ‘அம் ஆ’ – ‘ஆரோரம்’ பாடலுக்காக ஜெபா டாமி
சிறந்த பின்னணி பாடகர்: ‘ஏஆர்எம்’ – ‘கிளியே’ பாடலுக்காக கே.எஸ். ஹரிசங்கர்
சிறந்த எடிட்டர்: ‘கிஷ்கிந்தா காண்டம்’ – சூரஜ் இ.எஸ்.
சிறந்த டப்பிங் கலைஞர் (பெண்): ‘பரோஸ்’ – சயோனாரா பிலிப்
சிறந்த டப்பிங் கலைஞர் (ஆண்): ‘பரோஸ்’ – பாசி வைக்கம்
