கன்னட தொலைக்காட்சித் துறையிலும் பிக்பாஸ் நிகழ்ச்சியின் மூலம் புகழ்பெற்றவராக விளங்குபவர் பூமி ஷெட்டி. ‘ஜான்வி ஜானு’ என்ற கன்னட திரைப்படத்தின் மூலம் திரையுலகில் அறிமுகமான அவர், அதன் பின்னர் ‘சரத்துலு வர்த்திசிதி’, ‘கிங்டம்’ போன்ற தெலுங்கு திரைப்படங்களில் நடித்தார். தற்போது ‘ஹனுமன்’ திரைப்படத்தை இயக்கிய பிரசாந்த் வர்மாவின் அடுத்த படைப்பான ‘மஹாகாளி’யில் முக்கிய கதாபாத்திரமாக நடித்து வருகிறார்.
புராணங்களில் இடம்பெறும் ஹனுமன் என்ற கதாபாத்திரத்தை அடிப்படையாகக் கொண்டு ஒரு சூப்பர் ஹீரோவை உருவாக்கிய பிரசாந்த் வர்மா, இம்முறை நாட்டார் வழக்கில் வழிபடப்படும் தெய்வமான காளியை மையமாகக் கொண்டு ஒரு சூப்பர்வுமன் கதாபாத்திரத்தை உருவாக்கியுள்ளார். இத்திரைப்படத்தை ஆர்கேடி ஸ்டூடியோ நிறுவனம் தயாரித்து வருகிறது.
“ஹனு மேன் யூனிவர்ஸிலிருந்து” என்ற டேக்லைனுடன் வெளிவரவிருக்கும் இந்த படம், புராணக் கதைகளையும் நவீன சினிமாவின் கூறுகளையும் இணைத்து, இந்திய மித்திக் சூப்பர் ஹீரோ யூனிவர்ஸை உருவாக்கும் முயற்சியாக அமைந்துள்ளது என்பது தெளிவாகிறது.
