2018ஆம் ஆண்டு வெளியான ‘பரியேறும் பெருமாள்’ படத்தின் மூலம் தமிழ் சினிமாவில் இயக்குநராக அறிமுகமான மாரி செல்வராஜ், பின்னர் தனுஷ் நடித்த ‘கர்ணன்’, உதயநிதி ஸ்டாலின் நடித்த ‘மாமன்னன்’, ‘வாழை’ உள்ளிட்ட வெற்றி படங்களை இயக்கியுள்ளார்.
அதனைத் தொடர்ந்து, நடிகர் துருவ் விக்ரமை வைத்து தற்போது ‘பைசன்’ எனும் படத்தை இயக்கியுள்ளார். பா.ரஞ்சித்தின் நீலம் ஸ்டுடியோஸ் மற்றும் அப்ளாஸ் என்டர்டெயின்மெண்ட் இணைந்து தயாரித்துள்ள இந்தப் படத்தில் அனுபமா பரமேஸ்வரன், ரெஜிஷா விஜயன், பசுபதி, கலையரசன் உள்ளிட்ட பலர் நடித்துள்ளனர்.
இப்படம் வரும் அக்டோபர் 17ஆம் தேதி தீபாவளி பண்டிகையை முன்னிட்டு வெளியாக உள்ளது. இதற்கிடையில், இப்படத்தில் இருந்து வெளியான ‘தீக்கொளுத்தி’ பாடல் ரசிகர்களிடையே பெரும் வரவேற்பைப் பெற்றது. அந்தப் பாடலின் மேக்கிங் வீடியோவும் வைரலானது. தற்போது ‘பைசன்’ படத்தின் புதிய ‘காளமாடன் கானம்’ பாடலும் வெளியிடப்பட்டு ரசிகர்களின் கவனத்தை ஈர்த்துள்ளது.
